2024 2023 2022 Flere år...
20-09-2017
Nunat Avannarliit Siunnersuisoqatigiiffiata Inatsisartunit peqataaffigineqartumik ulluni 19. aamma 20. september ataatsimiinnerat
Nunat Avannarliit Siunnersuisoqatigiiffiata ulluni 19. aamma 20. september 2017-imi ataatsimiinnissaata Islandimiit Nunat Avannarliit Siunnersuisoqatigiiffiannut aallartitat tikeraartitsisoralugit Reykjavikkimi ingerlanneqarnissaa siornali pilersaarutigineqarsimavoq. Sapaatilli akunnerani kingullermi tassanngaannartumik qinersisoqarnissaanik nalunaaruteqartoqarnerata Islandimi Inatsisartunut ilaasortat akunnattuunganartumik inissisimalersippai, tassami Islandimi Inatsisartut Altinget atorunnaarsinneqarput qinersisoqartussanngorlunilu. Taamak pisoqartarnera nunani avannarlerni oqartussaaqataanermi malittarisassat malillugit nalinginnaasuuvoq, pisoq uissuummissutigineqanngilaq kikkullu tamarmik pikkorillutik akunnattuunganatillu tapersersuinerisigut nunani avannarlerni naalakkersuinermik suliallit ataatsimiinnissaat naapeqatigiinnissaallu pilersaarutaasutut ingerlanneqarput.
Inatsisartut 2017-imi ukiakkut ataatsimiinnissaasa aallartinnissaa nalliulluinnalermat Inatsisartunullu ilaasortat ataatsikkoortunik arlalinnik suliassaqarmata Nunat Avannarliit Siunnersuisoqatigiiffianni sinniisuusoq Iddimanngiiu Jensen Bianco kisimiilluni Inatsisartut sinnerlugit Reykjavikimi ataatsimiinnerni peqataasinnaasimavoq.
Parteeqatigiiaat ataatsimiinneri ulloq 19. september ingerlanneqarput. Tassani Iddimanngiiu Jensen Bianco nunat avannarliit suleqatigiiffiata iluani Inuit Ataqatigiit suleqataaffigisaanni VSG-mi (Venstresocialistiske Grønne Parti) ataatsimeeqataavoq. Parteeqatigiiaat ataatsimiinneranni nunani ataasiakkaani Inatsisartunit aallartitat peqataasut nunaminni naalakkersuinikkut pisut, nunami killiffik unammilligassallu pillugit nassuiaateqartarput, parteeqatigiiaarluni ataatsimiititaliani ataasiakkaani suliassanik piareersaateqarnerup saniatigut. Ataatsimiinnerit taakku angusaqarfiulluartumik oqalliffiusarput piareersaateqarfiulluartarlutillu.
Ulloq 20. september Nunani Avannarlerni Ilisimasanut Kulturimullu tunngasunut Ataatsimiititaliami ataatsimiittoqarpoq.
Nunani Avannarlerni Ilisimasanut Kulturimullu tunngasunut Ataatsimiititaliami sammisanik suliassanillu kulturimut, ilisimatusarnermut ilinniartitaanermullu, atuarfeqarnermut, inersimasut ilinniartitaanerannut innuttaasunillu qaammarsaanermut tunngasunik suliaqartoqartarpoq – tassani aamma oqaatsit pillugit suleqatigiinnermi, tusagassiuuteqarnermi, piginnaasanik ineriartortitsinermi ilinniartitaanermilu nutaaliornermi suliassat sammineqartarlutik. Ataatsimiititaliaq aamma inuiaqatigiit sunngiffimmi sammisartagaannut kiisalu namminneq piumassutsiminnik sullissisartut sulinerannut tunngassutilinnik suliaqartarpoq. Ataatsimiititaliattaaq sammisaanut soqutigisaqarfiinullu ilaapput timersorneq, oqaatsit, isiginnaagassiortarneq tusagassiuutillu, nalinginnaasumik siamasissumillu eqqumiitsuliorneq kulturilu kiisalu meeqqanut inuusuttunullu tunngassutillit.
Ilisimasanut Kulturimullu tunngasunut Ataatsimiititaliami, arlalinnik Kalaallit Nunaannut Kalaallillu Nunaata nunanut avannarlernut nunarsuullu sinneranut attuumassuteqarneranut pissanganartunik siunnersuuteqarfiusumik oqalliffiusumillu ataatsimiinnerup pissarsiaqarfiulluarnera Iddimanngiiu Jensen Biancop erseqqissaatigaa. Siunnersuutini arlalinni suliarineqartuni qarasaasiakkut ingerlatsinerup siuarsarneqarnera (digitalinngorsaaneq) taassumalu periarfissiissutai qitiutinneqarput. Immikkuualuttut pissagaanni pineqartunut ilaapput ilinniartitaaneq, ilisimatusarneq atugarissaarnermullu tunngassutillit.
Qarasaasiakkut kiffartuussinerit tamatumanilu periarfissat ineriartupiloorput taamaammallu tamatuma Kalaallit Nunaannut periarfissiissutai isiginiassallugit pingaaruteqarpoq, ingammik maannakkut ilaatigut immap naqqatigut kabelip teknikikkut ineriartornermut periarfissiineratigut.
Qarasaasiakkut attaveqatigiinneq assigiinngitsutigut periarfissanik ammaassisoq qularutissaanngilaq, tamatumattaarli ajortumik siunertalinnit attaveqaatitigut saassunneqarsinnaaneq ilimanarnerulersippaa, taamaammat Iddimanngiiu Jensen Biancop oqarnera malillugu qarasaasiakkut attaveqaatitigut isumannaallisaaneq ineriartornermut malinnaatinneqartariaqarpoq.
Ataatsimiinnermi aamma siunnersuutit inuusuttut ilinniakkaminnik unitsitsisarnerannut tunngassutillit oqallisigineqarput, ajornartorsiut Kalaallit Nunaanni, inuusuttut amerlasuut efterskolimi allanilu ilinniakkaminnik unitsitsiinnartarnerannik ajornartorsiuteqarfiusumi, Naalakkersuisullu ilisimasanik siunissamut iluarsiissutissanik pissutsinut piviusunut naleqqussakkanik nassaarniarnermut atugassanik katersuinissamik ilimasaariffigisaanni, pissutsit eqqarsaatigalugit attuumassutilerujussuaq. Ajornartorsiut 2018-imi aamma ataatsimiititaliamit isiginiarneqassaaq, peqataasullu iluarsiissutissanik atorneqarsinnaasunik nassaarniarlutik isumassarsiniaqatigiissallutik.
Tamakku saniatigut nunani avannarlerni aamma namminersorfiusuni tamani erinarsornerup ulluanut nunani avannarlerni ataatsimoorussamut ullorlu 23. marts ingerlanneqartartussamut siunnersuut ataatsimiititaliap suliaraa. Erinarsornerup ullua nunami namminermi ileqqutoqqat nunallu avannarliit kulturikkut ataqatigiinnerisa nukittorsarneqarnerannut ulloritinneqartussaq. Iddimanngiiu Jensen Biancop erseqqissaaneratut nunat avannarliit akornanni kulturikkut avitseqatigiinneq pissanganartoq nunanilu avannarlerni kulturikkut erinarsuutit erinarsuutillu eriagineqartut pillugit ilisimasanik tunniusseqatigiiffik.
Nunat Avannarliit Siunnersuisoqatigiiffiata ataatsimiinnerat tulleq Helsingforsimi Nunat Avannarliit Siunnersuisoqatigiiffiata 2017-imi ulluni 30. oktobarimiit 2. novembarimut 69-issaannik ataatsimeersuarnerani ingerlanneqassaaq.
Paasisaqarnerujumalluni Iddimanngiiu Jensen Bianco oqarasuaammut uunga saaffigineqarsinnaavoq; 00299 54 88 44.
Nunat Avannarliit Siunnersuisoqatigiiffiat inatsisartutigoortumik suleqatigiiffiuvoq Norgemit, Danmarkimit, Sverigemit, Finlandimit, Islandimit nunanillu namminersorfiusunit Ålandimit, Savalimmiunit Kalaallillu Nunaannit inatsisartunut ilaasortanik 87-inik ilaasortalik.
Inatsisartut Nunat Avannarliit Siunnersuisoqatigiiffianni marlunnik ilaasortaatitaqarput marlunnillu sinniisuutitaqarlutik. Ineqi Kielsen, Siumut, ilaasortaavoq Vivian Motzfeldt, Siumut sinniisoralugu aammalu Mimi Karlsen Inuit Ataqatigiit, ilaasortaavoq Iddimanngiiu Bianco, Inuit Ataqatigiit sinniisoralugu. Mimi Karlsen/Iddimanngiiu Bianco nunani avannarlerni ilisimasanut kulturimullu tunngasunut ataatsimiititaliamut ilaasortaavoq aammalu Ineqi Kielsen/Vivian Motzfeldt nunat avannarliit attanneqarsinnaanerannut ataatsimiititaliamut ilaasortaalluni. Nunat Avannarliit Siunnersuisoqatigiiffianni ilaasortat sinniisullu Inatsisartunut ilaasortaassapput taakkunanngalu toqqagaassallutik.