2024 2023 2022 Flere år...
21-09-2017
Illersornissamut isumaqatigiissut 1951 eqqarsaatigeqqinneqarlunilu nutarterneqartariaqaarpoq
Nunanut Allanut Sillimaniarnermullu Ataatsimiititaliap ullumi ataatsimiinnermini Pituffimmut tunngasut oqallisigigai, tamatumunnga ilanngullugit Pituffimmut imaatigut assartuisarnermik suliassamik Royal Arctic Line-ip annaasaqarsimanera kiisalu Pituffimmi radarip nutarterneqarsimanera.
Ataatsimiititaliaq pakatsisimavoq, misigisimalluni soorlulusooq Pituffik eqqarsaatigalugu suliaq tamarmi apeqqutillu tamarmik uninngaannartut iliuuseqarfigineqassanatik. Taamaakkaluartoq nunarsuaq unigani ingerlavoq, kisiannili Pituffik pillugu suliamut tunngatillugu nunatta/Danmarkip USA-llu akornanni isumaqatigiinniarnerisa soorlulusooq suliassat allat tamaasa unitsissimagai – RAL-ip Pituffimmik imaatigut pilersuinermimmi annaasaqarnera, Pituffimmi radarip nutarterneqarnera eqqarsaatigalugu apeqqutit, ataatsimut ataatsimiititaliami Joint Committeemi aamma ataavartumik ataatsimiititaliami Permanent Committeemi sulineq?
Suliassanut atatillugu pissutsit pitsaanerulinngillat isumaqarnarmat Illersornissamut isumaqatigiissut 1951-imeersoq Igalikumilu isumaqatigiissut 2004-meersut eqqarsaatigalugit illuatungeriit akornanni aaqqiagiinngissutit qanoq qaangerneqartarnissaat ataatsimut isumaqatigiissutigineqarsimanngitsoq.
Ataatsimiititaliap taamaattumik kaammattuutigeqqissavaa Illersornissamut isumaqatigiissutip 1951-imeersup tamatumalu kingorna ilassutitut isumaqatigiissutaasimasut eqqarsaatigeqqinneqarlutillu nutarterneqarnissaat, ukiuni kingullerni 66-ini pisimasut, minnerunngitsumillu ukiut ingerlaneranni misilittagaalersimasut, tunngavigalugit.
Ataatsimiititaliap ilanngullugu Tunngaviusumik inatsisissaq pillugu isumalioqatigiissitamut kaammattuutigaa sulinermini nunatsinnit nunanut allanut sillimaniarnermullu tunngasutigut naalakkersuinikkut pissutsit ajornartorsiutillu qaangerniagassat ilaateqqullugit.
Ane Hansen
Nunanut Allanut Sillimaniarnermullu Ataatsimiititaliap Siulittaasua
Paasissutissat sukumiinerusut ataatsimiititaliap siulittaasua Ane Hansen 58 76 61 attaveqarfigalugu pissarsiarineqarsinnaapput.