2024 2023 2022 Flere år...
03-12-2017
Issittumi ineriartorneq avatitta oqaluuseraat – oqaloqataanissarput pingaaruteqarpoq, aammali siuttuulluta aaqqissuisuulluta qulequtsersuinissarput
Nunanut Allanut Sillimaniarnermullu Ataatsimiititaliaq Issittoq, kiisalu Naalagaaffeqatigiit sillimaniarnermut illersornissamullu tunngasutigut naalakkersuinikkut ingerlatsinerat, qitiutillugit ulluni sisamani Københavnimut paasisassarsiorluni angalaqqammerpoq. Ataatsimiititaliap paasisassarsiorluni angalanini naggaserlugu nunanut allanut ministeriaqarfimmi isummersoqatigiinnermut ”Sustainable Development Goals in the Arctic – Local og Global Perspectives” (Issittumi piujuartitsinermik tunngavilimmik ineriartortitsinermi anguniagassat – najukkat nunarsuarlu eqqarsaatigalugit) peqataavoq
Issittumik soqutiginninneq annertusiartorpoq. Siusinnerusukkut soqutiginninneq issittup suuneranut sammisimariarluni, ullumikkut soqutiginninneq allamut saassimavoq; Issittumi aningaasaqarniarnikkut inuttullu atugarisatigut ineriartornermik qanoq pilersitsitsinnaavugut? Issittoq ullumikkut tassaaginnanngilaq silap pissusiisa allanngoriartornera sermilluunniit aakkiartornera. Issittoq aamma tassaavoq inuussutissarsiornikkut aningaaliissuteqartarnikkullu periarfissat.
Issittoq nunarsuatta immikkoortuisa ilagaat eqqissisimaffiusoq, kisiannili pissutsit taamaannerat attatiinnarniaraanni nunat tamalaat akornanni suliniartuarnissaq ilaatigut piumasaqaataavoq. Illersornissamut sillimaniarnermullu tunngasut nunatta suli tamakkiisumik oqartussaaffiginngilai. Taamaattumik ataatsimiititaliap pisariaqartippaa tamakku pillugit oqallinnermi nammineq peqataanerunissarput Issittullu illersorneqarnerata nukittorsarneqarnissaanik danskit naalakkersuisuinik Folketingillu pingaarnersiuinerinik sunniiniarnissarput.
Issittumik soqutiginninnerup sammiviata allanngoriartornera ataatsimiititaliap malugisinnaavaa taamaattumillu pingaartutut isigalugu nunatta tamatumani sinniisuutitaqartarnissaa naalakkersuinermullu tunngasutigut nunat tamalaat akornanni aaqqissuussinermut timitalimmik peqataasarnissaa – paasissutissanik ilisimasanillu katersilluni, peqataasullu allat nunarput pillugu paasissutissanik ilisimasanillu immersorlugit. Ataatsimiititaliap Naalakkersuisunut kaammattuutigaa sulissutigeqqullugu, ilaatigut Ilisimatusarfik suleqatigalugu, nunarput Issittorlu pillugit isummersoqatigiinnernik isumasioqatigiinnernilluunniit amerlanerusunik nunatsinni aaqqissuussisoqartarnissaa. Ataatsimiititaliaq piareersimavoq tamatumunnga suleqataanissaminut, assersuutigalugu aaqqissuusseqataasutut. Nunat tamalaat akornanni suliniarneq imaannaanngilaq sivisusinnaallunilu, angusaqarniaraanni ataavartumik tunniusimanermik piumasaqarfiusoq. Avatitsinniit misissuiffiusussatut soqutiginartutut isigineqaannarnerput qimallugu, annerusumik nunarsuarmioqatigiit akornanni pisunut timitalimmik peqataanerulertariaqarpugut. Taamaattumik nunat tamalaat akornanni suliniarnermi suleqatigiittariaqarpugut timitalimmillu peqataalluta, minnerunngitsumik Issittumi ineriartornerup piujuaannartitsinermik tunngaveqarluni ingerlanneqarnissaata qularnaarniarneqarnerani.
Paasissutissat sukumiinerusut ataatsimiititaliap siulittaasua Aaja Chemnitz Larsen +45 6162 4667 attaveqarfigalugu pissarsiarineqarsinnaapput.