2024 2023 2022 Flere år...
08-03-2017
§ 37 naapertorlugu Inatsisartunit Naalakkersuisunut apeqqutit
Siulittaasoqarfiup maluginiarpaa Inatsisartunut ilaasortat Naalakkersuisunut § 37 naapertorlugu amerlavallaanik apeqquteqartarnersut apeqqutillu pineqartut apeqqutigissallugit pissutissaqartoqarsimanersoq ulluni arlalinngortuni tusagassiorfitsigut Naalakkersuisut siulittaasuat oqaloqatigineqartarsimammat.
Siulittaasoqarfiup aallaavittut maluginiarpaa Naalakkersuisut tusagassiorfitsigut § 37 naapertorlugu apeqqutit amerlassusii pillugit isornartorsiuilinnginnerminni apeqqut pillugu siulittaasoqarfimmut saaffiginnissuteqarsimanngimmata.
Inatsisartut suleriaasianni § 37-mi atuarneqarsinnaavoq pisortat suliassaataat pillugit paasissutissanik ilaasortat pissarsiniarsinnaasut Naalakkersuisunut apeqquteqarnermikkut. Ilanngullugu allassimavoq Naalakkersuisut apeqqut akissuteqarfigisinnaanngippassuk, taava suliassaq naammassissasoq.
Taamaattumik siulittaasoqarfik erseqqilluinnartumik isumaqarpoq ilaasortat pisariaqartitatik malillugit qanoq amerlatigisunilluunniit apeqquteqarnissaminnut pisinnaatitaaffeqarlutillu periarfissaqartut inatsisartutigoortumillu sulinerminni killilerneqarsinnaanngitsut, qanoq amerlatigisunik qanorlu akulikitsigisumik apeqquteqarsinnaanerup imaluunniit apeqqutit qanoq takitiginissaasa killilerneqarnerisigut.
Siulittaasoqarfiup aamma inerniliuttariaqarpaa, ilaasortatut Inatsisartunut ilaasortatut sulinerminni suliaqarnertik tunniusimanertillu takutittarmassuk Naalakkersuisunit paasissutissanik pissarsiniarnermikkut. Taamatut § 37 malillugu apeqquteqarnissamut pisariaqartitsineq eqqarsaatigalugu aamma eqqaamaneqassaaq ilaasortat ukiumut marloriaannarlutik qaammatinik marlunnik pingasunilluunniit sivisussusilimmik katersuuttarmata, taamalu ingerlaavartumik ataavartumillu ataatsimiititaliat sulinerat aqqutigalugu apeqqutit apeqqutigineqarsinnaasaratik.
§37 malillugu apeqqutit amerlassusiat qularnanngitsumik aamma ersersinneqarsinnaavoq Inatsisartut sivisunerusumik katersuussimasartuuppata ataatsimiititaliat apeqqutaasa amerlassusianni, Inatsisartummi katersuussimanerisa nalaanni ataatsimiititaliat Naalakkersuisunut aamma apeqquterpassuaqartarmata.
Pissutsit tamakku inatsisartunilu sulinermut atugassarititaasut eqqarsaatigalugit assigiinngisitaarnerusumik oqallinneq – Naalakkersuisut siulittaasuannut tusagassiorfitsigullu nalinginnaasumik oqallinnermut – anguneqarsimasinnaagaluarpoq § 37 naapertorlugu Naalakkersuisunut apeqqutit amerlassusii pillugit oqallinneq tamatigoornerullunilu assigiinngisitaarnerusuuppat.
Assersuutitut – ilaalu ilanngullugit – Inatsisartunit erseqqissarneqarsinnaavoq Naalakkersuisut katersuunnernut inatsisissatut siunnersuuterpassuarnik aamma saqqummiussaqartarmata – Naalakkersuisummi taamaaliorsinnaatitaammata - Inatsisartut katersuunnermik nalaanni aamma naammassillugit suliarisariaqartagaannik, aamma apeqqutaatinnagu tamanna Inatsisartunut allaffissornikkut akunnerpassuarnik aningaasartuutinillu qanoq annertutigisumik kinguneqassanersoq. Inatsisartut suliassaq tamanna tigullugulu suliassamittut naammassisarpaat Naalakkersuisut tamatumunnga isornartorsiunngikkaluarlugit.
Inatsisartoqarneq qinikkallu aqqutigalugit innuttaasut oqartussaaqataanerat soorunami akeqarpoq, Naalakkersuisut Inatsisartulluunniit apeqqutaatinnagit. Siulittaasoqarfik inatsisartoqarnikkut maanna nunatsinni aaqqissuussaanitsinnut sooruna tunuliaqutaavoq, ilaasortallu Inatsisartunut ilaasortatut suliassaminnik ingerlatsinissaannut periarfissaannik killilerniarnagit.
Naggataatigut Siulittaasoqarfiup Naalakkersuisunut kaammattuutigaa tamatumunnga taarsiullugu malittarisassat Inatsisartunit akuersissutigineqarsimasut naapertorlugit akisussaaffitsik tigoqqullugu, ajornartorsiutinut nammineq pilersitaminnut akisussaaffik qimarratiginagu suliassamik naammassiniarneratigut.
Lars-Emil Johansen
Inatsisartut Siulittaasuat
Annertunerusumik paasisaqarusukkaanni saaffigineqarsinnaavoq Inatsisartut Siulittaasuat Lars-Emil Johansen attavigineqarsinnaavoq mobil +299 55 19 15.