2024 2023 2022 Flere år...
18-01-2018
Hans Pavia Egedemik eqqaaniut
Hans Pavia Egede 1954-imi decembarip ulluisa pingajuanni Nuummi inuusoq, ataasinngornermi januaarip ulluisa 15-ianni 2018 toqukkut qimaguppoq.
Hans Pavia niuernermik ilinniarnini naammassillugu 1973-imi soraarummeerpoq, tamatumalu kingorna 1979-imi kukkunersiuinermik suliffeqarfik kalaallinit pigineqartoq siullerpaaq Nuuk Revisionsfirma Aps 1979-imi pilersillugu. Kukkunersiuinermik suliffeqarfik 1985-imi allanngortinneqarpoq Egede og Brøns A/S-inngorluni.
Hans Paviap tamatuma saniatigut Anders Brøns peqatigalugu Polar Seafood 1984-imi pilersippaa.
Hans Pavia qinigaaffinni arlalinni Nuummi kommunalbestyrelsimut Atassut sinnerlugu ilaasortaavoq 2008-mi partii qimallugu Inuit Ataqatigiinnut ilaasortanngornermi tungaanut. Hans Pavia taamatuttaaq qinigaaffimmi 1991-imiit 1995-imut Akulliit Partiiat sinnerlugu Inatsisartunut ilaasortaavoq.
Hans Pavia siulersuisunut ilaasortaaffippassuaqarsimavoq, taakkununnga ilaallutik Polar Seafood Danmark A/S, Polar Seafood Trawl A/S aamma Polar Fisk Upernavik ApS. Taamatuttaaq Egede og Brøns A/S-imi, Avataasiutinik Piginneqatigiiffiit Kattuffianni Team Greenlandimilu siulersuisunut ilaasortaasimavoq.
Hans Pavia Egede svenskit kunngikkormiut nersornaasiuttagaannik Ridder af Nordstjerneorden af 1. klassimik, inunnut Sverigemut svenskilluunniit soqutigisaannut iluaqutaasunik suliaqarsimasunut tunniunneqartartumik, nersornaaserneqarsimavortaaq.
Hans Pavia ukiuni 23-ni Sverigep pisortatigoortumik sinniisaatut akissarsiaqanngitsumik generalkonsulitut aamma atuussimavoq.
Hans Pavia aamma eqqaamaneqassaaq inuusunnermini arsallaqqissutut, soorunami illoqarfiup asaqisami timersoqatigiiffia NÛK sinnerlugu.
Eqqaaneqarnera ataqqinartuuli.
Ikinngutinnersumik inuulluaqqusillunga
Lars-Emil Johansen