2024 2023 2022 Flere år...
28-01-2018
Issittumi piujuartitsiviusumik ineriartorneq – periarfissat unammilligassallu – Arctic Frontiers
Nunanut Allanut Sillimaniarnermullu Ataatsimiititaliamit aallartitat januaarip ulluisa 21-annit 23-annut Norgemi Tromsømi Arctic Frontiers ”Connecting the Arctic”/”Issittumi Attaveqalersitsineq” qulequtaralugu isummersoqatigiissitsineranut peqataapput.
Issittoq tassaannaanngilaq siku aakkiartortoq nunarsuarmioqatigiillu silap pissusiisa allanngoriartornerinut igalaavat. Issittoq aamma tassaavoq ilisimatusarneq aamma inuussutissarsiornikkut aningaasaliissuteqartarnikkullu periarfissat. Issittup tamarmi innuttaasullu peqataatinneqarnissaasa qanoq qularnaarneqarnissaa ineriartornerullu Naalagaaffiit Peqatigiit piujuartitsiviusumik ineriartorneq pillugu nunarsuarmioqatigiinnut anguniagassiaat 17-it tunngavigalugit pinissaa tamatumani unammilligassaavoq.
Aallartitat pingaartutut isigaat nunanit tamalaanit peqataaffigineqartunik issittoq pillugu isummersoqatigiinnerni nunatta naalakkersuisutigut sinniisuutitaqarlunilu timitalimmik peqataasarnissaa, soorlu Arctic Frontiersimi nunat assigiinngitsut naalakkersuinikkut qaffasinnerpaanik peqataatitaqartut. Aallartitat ajuusaarnartutut isigaat Naalakkersuisut Arctic Frontiersimut peqataatitaqanngimmata. Nunarput Issittumi qitiulluinnarpoq, Issittumilu ineriartornermut isiginnaartuuginnarata siunnerfilersuinermut peqataasariaqarpugut. Naalakkersuisutigoortumik nunatta peqataatitaqartannginneratigut, ajuusaarnaraluartumik issittoq pillugu oqallittarnerit nunanit issittup avataaniittunit annertuallaamik sunnersimaneqarnerannut peqataavugut - taamaaliornianngikkaluarluta. Issittumi naalagaaffiit innuttaasullu Issittumi ineriartornermut aqqutissiuussisussaapput. Siunissarput eqqarsaatigalugu anguniagassatta takorluukkattalu aalajangersarneqarnerat allanut tunniutissagutsigu, tamanna aningaasaqarniarnikkut naalakkersuinikkullu kiffaanngissuseqarniarnitsinnut aseruutaasumik nunasiaateqarsimasut naalakkersuinikkut aningaasaqarniarnikkullu akulerussinnaanerannik, nunasiaateqariaatsimik nutaamik, akuersaarneruvoq. Aallartitat Naalakkersuisunut kaammattuutigerusuppaat Issittoq pillugu oqallinnerup Issittumi innuttaasut peqataatilluinnarlugit ingerlanneqarnissaa sulissutigeqqullugu. Naatsumik oqaatigalugu: Uagut’una nunagalugu najugarput, ineriartornerlu uagut suleqatigaluta pisariaqarluni, ajornanngippat nunarsuaq tamaat peqatigalugu suliniutitigut tigussaasutigut.
Aallartitat isummersoqatigiinnerup naalakkersuinikkut ingerlatsinermut tunngasortaanut peqataapput, tassani qulequttat pingaarnerit ilagalugu Issittumi ineriartornerup pinngortitamilu pisuussutit illersorneqarnerisa oqimaaqatigiissinneqarnissaat. Ineriartorneq pissaaq teknikikkut atortulersuutit ilinniartitaanerillu pitsaanerusut aqqutigalugit, minnerunngitsumillu attaveqaqatigiinnermut, angallannermut pilersuinermullu atortulersuutit pitsaanerusut aqqutigalugit. Issittumi pinngortitami pisuussutinik iluaquteqarniarneq ineriartornissamut aningaasatigut tunngavisseeqataasinnaavoq, iluaquteqarniarnerli piujuartitsinermik tunngaveqartariaqarluni. Peqatigitillugu erseqqissarneqarpoq Issittoq taannaannaanani, tassaammat inuiaqatigiit mikinerusut anginerusullu assigiinngitsorpassuit amerlasuut – taamaattumillu nunarsuaq tamakkerlugu ineriartorneq atorneqartariaqarluni najukkani aaqqiissutaasinnaasunik ujarlernermut.
Isummersoqatigiinnerup kingorna aallartitat ilinniartunik, Arctic Frontiers Student Forumimut peqataasunik, tamarmillu ataatsimut Issittoq pillugu soqutigisalinnik, naapeqateqarnermi uppernarsarneqartumik, naapeqateqarpoq. Naapeqateqarnermi nunatta nunanut allanut tunngasutigut naalakkersuinikkut ingerlatsinera sammineqartussaagaluarpoq, namminiilivinniarlunili sulineq ingerlaannaq tikinneqarluni, oqallikkususseqarneq apeqquteqarususseqarnerlu annertulluni.
Paasissutissanik sukumiinerusunik pissarsiniaraanni aallartitat siuttuat Justus Hansen +299 53 12 10 attaveqarfigineqarsinnaavoq.
Ataatsimiititaliamut ilaasortat uku Arctic Frontiersimut peqataapput: Siulittaasup tullia Justus Hansen (D), Vivian Motzfeldt (S), Bendt B. Kristiansen (IA), aamma Per Rosing-Petersen (PN).