Nutaarsiassat

04-06-2018

Inatsisartut Siulittaasuata Hans Enoksenip ulloq 4. juni 2018 Julius Jeremiassen, Niaqornaarsuk, sølviusumik Nersornaaserpaa

Inatsisartut Siulittaasuata aalisartoq, piniartoq, Kangaatsiap kommunerisimasaani kommunalbestyrelsimut siulittaasuusimasoq siulleq, Julius Jeremiassen, Niaqornaarsummi ukiorpassuarni qasusuilluni tunniusimallunilu inuussutissarsiornikkut, aalisarnerup iluani Niaqornaarsummilu najukkami qinikkatut, suliniuteqarsimanera nersorniarlugu sølviusumik Nersornaaserpaa. Nersornaasiineq Atuarfik Kristian Lundbladip inersuaani ingerlanneqarpoq.

Inatsisartut Siulittaasuata Hans Enoksenip Julius Jeremiassenimut oqaaseqarnermini ilaatigut erseqqissarpai:

Oqalugiaat

“Inuusuttunnguullutilli aalisartutut piniartutullu inuussutissarsiuteqalersimavutit nunaqarfinni nunallu sinnerani maligassiuilluarsimallutit.

Tuberkuloseqaraluarlutit pujortuleerartaarnissaq suliniutigisimavat kingusinnerusukkullu aamma 42 fodsilimmik raajarniutitaarlutit.

Suli ullumikkumut 82-nik ukioqaraluarlutit inuussutissarsiutit attappat, 2013-milu 75-76-nik ukioqarlutit Niaqornaarsuup fabrikkiani tunisaqanerpaatut nersornaaserneqarlutit.

Inuusuttuunngullutilli naalakkersuinermik suliaqarnermi eqeersimaarlutit sulisimavutit, ilaatigut kommunalbestyrelsimi ukiut 14-it ilaasortaasimallutit, kommunit nammineersinnaanerat, kommunimi suliffissaqartitsinissaq, kiisalu nunami imaanilu avatangiisit illesorneqarnissaat pingaartissimallugit.

Kingusinnerusukkut Kangaatsiap kommunerisimasaani namminerisaminik kommuninngornissaanik anguniagarsi piviusunngortikkassiuk Kangaatsiap Kommunerisimasaani kommunalbestyrelsimut siulittaasunngorputit siulleq.”

Siulittaasoqarfik sinnerlugu

Hans Enoksen
Inatsisartut Siulittaasuat