2024 2023 2022 Flere år...
20-07-2018
Inatsisartut Siulittaasuat Hans Enoksen Islandip namminersulerluni tamakkiisumik imminut oqartussaaffigilerneranit ukiut 100-nngortorsiorlugit nalliuttorsiornermi peqataavoq
Inatsisartut Siulittaasuat Hans Enoksen sapaatip akunnerani matumani, Islandip tigummisaajunnaarluni tamakkiisumik imminut oqartussaaffigilerneranit ukiut 100-nngortorsiorlugit nalliuttorsiutigineqarnerannut peqataajartorluni Islandimiippoq. Islandimi Inatsisartut Altingip oqaluttuarisaanermi, tassalu ukioq 930-miilli ataatsimiittarfigisimasaani, Thingvellirimi pingasunngormat nalliuttorsiortoqarpoq.
Thingvellirimi oqalugiartut tassaapput Althingip Siulittaasua Steingrímur J. Sigfússon, Islandip præsidentia Guðni Th. Jóhannesson, Ministeriuneq Katrín Jakobsdóttir, partiit ataasiakkaat siulittaasui kiisalu Danmarkimit aallartitatut Folketingip Siulittaasua Pia Kjærsgård. Danskit Islandimiullu ukiut 100-t matuma siorna, Islandimik namminiilivilluni naalagaaffinngortitsisumik, naalagaaffiit suleqatigiinnissaannut inatsimmik atsioqatigiissuteqarnerat oqalugiaatini eqqissisimasumik ataqqeqatigiiffiusumillu saqqummiunneqartuni erseqqissaatigineqarpoq.
Inatsisartut Siulittaasuata siulittaasoqatini Islandimi Inatsisartut Siulittaasuat Steingrímur J. Sigfússon pilluaqquaa inuiaallu Islandimiut tamaasa pilluaqqutillugit. Ukiut 100-t matuma siorna pisimasup takutippaa, qanoq nunat marluk imminnut ataqqeqatigiillutik, akunnerminni pitsaasumik attaveqatigiinnerminnik attassiinnarlutik tamarmillu tamakkiisumik imminnut oqartussaaffiginerannik namminersornerannillu isumannaarisumik isumaqatigiissuteqarsinnaasut.