2024 2023 2022 Flere år...
20-09-2018
Nunanut Allanut Sillimaniarnermullu Ataatsimiititaliaq Kalaallit Nunaanni illersornissaq pillugu amerikamiut aningaasaliissutaat pillugit siunersiuinermut qaaqquisivoq
Nunanut Allanut Sillimaniarnermullu Ataatsimiititaliap Naalakkersuisut Siulittaasuat kiisalu Ilinniartitaanermut, Kultureqarnermut, Ilageeqarnermut Nunanut Allanullu Naalakkersuisoq ulloq 24. september 2018 nal. 09.00 siunersiuinermut qaaqquai.
Amerikamiut Kalaallit Nunaanni illersornissakkut aningaasaliissuteqarnissamik siunniussamik nalunaaruteqarnerannut kiisalu tamatuma malittuanik amerikamiut siunniussamik nalunaarutaannik kunngeqarfiup Danmarkip Kalaallit Nunaat ilanngullugu ilassinnilluarneranik imaqartumik danskit kalaallillu ulloq 17. september tusagassiorfinnut nalunaarutaannut malitsitut siunersiuisoqassaaq.
Siunersiuineq amerikamiut siunniussamik nalunaarutaannik erseqqinnerusumik oqallisiginninnermut atorneqassaaq, tamatumani ilaatigut nalunaaruteqarnerup nassataanik immikkuualuttunik naalakkersuinikkut isumaqatigiinniutiginninnerit pillugit apeqquteqarnissaminut attaatsimiititaliaq periarfissaqassalluni. Isumaqatigiinniarnernut piffissaq atorneqartussaq kiisalu Kalaallit Nunaanni illersornissakkut amerikamiut aningaasaliissutigisinnaasaasa aningaasaqarnikkut illersornissakkullu kingunissaat ataatsimiititaliamit immikkut soqutiginartinneqarput. Ataatsimiititaliap peqatigitillugu erseqqissaatigiumavaa danskit kalaallillu siunissami tusagassiorfinnut ataatsimoorussamik nalunaarutaasa nunani marlunni ataatsikkut saqqummiunneqartarnissaat pisariaqarmat.
Amerikamiut aningaasaliissuteqarsinnaanerannut paasissutissat ilaat isertuussassatut ataatsimiititaliamut tunniunneqarsimammata ataatsimiinneq siunersiuinertut matoqqasutut ingerlanneqassaaq.
Nunanut Allanut Sillimaniarnermullu Ataatsimiititaliaq sinnerlugu
Aleqa Hammond
Ataatsimiititaliap Siulittaasua
Paasisaqarnerujumalluni ataatsimiititaliap Siulittaasua Aleqa Hammond; (+299 49 23 09) kiisalu Siulittaasup tullia Sara Olsvig; (+299 52 68 58) saaggigineqarsinnaapput