2024 2023 2022 Flere år...
13-12-2018
Ukiup naannginnerani – tunumi qilalukkanik qernertanik immikkut pisassiinissamik apeqquteqarnerup aalajangiiffigineqarnissaa pillugu Aalisarnermut, Piniarnermut Nunalerinermullu Ataatsimiititaliap Naalakkersuisoq isummeqqullugu kaammattorpaa
Tunumi qilalukkanik qernertanik immikkut pisassiinissaq eqqarsarnartoqartinnagu Aalisarnermut, Piniarnermut Nunalerinermullu Naalakkersuisup AG-imut ulloq 12. december 2018 oqarnera ataatsimiititaliamit qiimmaallannartoqartinneqarpoq.
Nalliuttut qanilliartorput, taamaattumillu aalisartut piniartullu minnerunngitsumik Tasiilameersut namminneq misigisatik atukkatillu pillugit ataatsimiititaliamut ilaasortanut toqqaannartumik saaffiginnittut ataatsimiititaliamit isumakulunnartinneqarput. Aalisartut piniartullu ilarpassui suliffissaqarnikkut allamik decembarip qaammataani isertitaqaatigisinnaasaminnik periarfissaqannginnerat ataatsimiititaliap Naalakkersuisunut eqqaasitsissutigissavaa.
Aalisartut piniartullu ilisimasaannik uppernarsaasersuineq Pinngortitaleriffik suleqatigalugu nukittorsarneqaqqullugu ataatsimiititaliap Naalakkersuisut kaammattussavai, taamaaliornikkut pisassanik aalajangersaaneq pillugu nunanik allanik nunallu tamalaat kattuffiinik isumaqatigiinniarnermi nunarput nukittuneroqqullugu.
Taamaattumillu tunumut immikkut pisasseeqqinnissamik apeqqut piaartumik paasinarsiseqqullugu Naalakkersuisut ataatsimiititaliamit sakkortuumik kaammattorneqarput, taamaalillutik aalisartut piniartullu nalorniunnaaqqullugit – pisariaqartippaammi.
Henrik Fleischer
Aalisarnermut, Piniarnermut Nunalerinermullu Ataatsimiititaliap Siulittaasua
Allanik paasissutissanik pissarserusuttunut ataatsimiititaliap siulittaasua saaffigineqarsinnaavoq: mobil +299 52 78 82