Nutaarsiassat

14-02-2019

Siulittaasoqarfiup Torshavnimi Lagtingip Siulittaasoqarfianut paasisassarsiorluni tikeraarnera

Siulittaasoqarfik inatsisartoqarnikkut sulinermi ataatsimoorullugit unammilligassat pillugit oqallisiginnikkiartorluni Lagtingip Siulittaasoqarfianut ulloq 5. februar 2019-imi tikeraarpoq.

Siulittaasoqarfik tassaavoq Inatsisartut Siulittaasuat Vivian Motzfeldt Siulittaasullu tullii Mimi Karlsen, Randi V. Evaldsen, Peter Olsen kiisalu Jess Svane.

Lagtingip inatsisartoqarfiatalu oqaluttuassartallip suleqataasunut, naalakkersuinermillu sulialinnut kusanarluinnartumik nutaaliaasunik allaffissornermut ataatsimiinnernullu atortulersukkamik ilassusikkap pulaarnissaanut periarfissaqarsimalluni.

Taakku inatsisartoqarnikkut sulinerminnik aaqqissuussisimanerannik Lagtingimi siulittaasoqarfimmit isumassarsianik pissarsiniarnissaq Siulittaasoqarfimmit kissaatigineqarsimavoq.

Lagtingimi ataatsimiititaliat katitigaanerat, Savalimmiuni partiit, aningaasarsiaqartitaanermut maleruagassat, oqaaseqarnermut piffissaliisarneq, Inatsisartut ataatsimiittarfianni sammisaqartitsilluni oqallisiginnittarnerit il.il. Siulittaasoqarfinnit oqallisigineqarput.

Aammattaaq Siulittaasoqarfiup ilinniarfissuartaamut “Glasir”-imut pulaarnissaa Lagtingip Siulittaasuata pilersaarutinut ilanngussimavaa, tassani inuusuttunut ilinniartitsinerit amerlasuut illumut ataatsimut nuttaliaalluinnartunik, isumassarsiassanik pissarsiffiulluartunik sinaakkusersukkamut katersorneqarsimapput.

Tamatuma saniatigut Savalimmiuni innaallagissiorfik SEV Siulittaasoqarfimmit pulaarneqarpoq. Tassani Savalimmiormiut kingusinnerpaamik 2030-imi anorisaatit, erngup nukinga kiisalu ulittarnerata tinittarneratalu nukiinik tamakkiisumik imminnut pilersulernissamik pilersaarutaat pillugu Siulittaasoqarfik saqqummiussivigineqarpoq. Pilersaarut annertuumik anguniagaqarfiusoq Savalimmiuni nunami nukissiutinik atuinermi ikummatissanik pisariaarutitsisussaq.

Tamatuma kingorna Siulittaasoqarfik upernaakkut ataatsimiinnissaq aggersoq, taassuma pilersaarusiornissaa, Inatsisartuni namminerni partiit akornanni suleriaatsit, Siulittaasoqarfik ataatsimiititaliallu pillugit isumasioqatigiippoq. Taamatuttaaq illuutit piusut aserfallatsaalineranni kinguaattoornermut iluarsiissutaasinnaasunik nassaarniarluni suleqatigiissitamik pilersitsisariaqarneq, aalajangiiffigisassatut siunnersuut UKA18-imeersoq Siulittaasoqarfimmit suliarineqartoq tunngavigalugu partiinut tapiissuteqartarnermut inatsisip allanngortinneqarsinnaanera, taamatullu Inatsisartut suleriaasianni oqaaseqarnissamut piffissaliussat najuutinngikkallartarnermullu maleruagassat naleqqussarumaneqartut Siulittaasoqarfiup oqallisigai.

Inussiarnersumik inuulluaqqusillunga

Vivian Motzfeldt

Inatsisartut Siulittaasuat