2024 2023 2022 Flere år...
27-02-2019
2019-imi Inatsisartut upernaakkut ataatsimiinnissaannut (UPA2019) oqaluuserisassat ullumi nassiussuunneqarput
Inatsisartut upernaakkut ataatsimiinnerat (UPA 2019) tallimanngornermi ulloq 22. marts, nal. 11.00 aallartissaaq, pilersaarutillu malillugit ulloq 5. juni 2019 naammassinissaa naatsorsuutigineqarluni.
Inatsisartunut ilaasortanit immikkoortut nutaat katillugit 80-it Naalakkersuisunillu immikkoortut nutaat 24-t oqaluuserisassanut ilanngunneqarput.
Sapaatit akunnerini ullut ataatsimiiffiusartussat ima agguataarneqarput:
- Upernaakkut ataatsimiinneq tallimanngorneq ulloq 22. marts, nal. 11.00 aallartissaaq
- Sapaatip akunnerani ullut pingasut Inatsisartuni nal. 11.00-imiit 17.00-imut ataatsimiiffiussapput
- 22/3, 25/3, 13/5 aamma 27/5 minillugit ataasinngornerit tallimanngornerillu ataatsimiititaliani ataatsimiiffiussapput
- Pingasunngornerit tamaasa piffissami nal. 10.00-imiit nal. 11.00-imut naalakkersuisunut akunneq apeqquteqarfiusinnaasoq ingerlanneqartassaaq, tamannalu pereeraangat Inatsisartut ataatsimiinnerat nal. 17.00 tungaanut ingerlaqqittassalluni. Akunneq apeqquteqarfiusinnaasoq siulleq ulloq 27. marts ingerlanneqassaaq. Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq.
- Piffissami 12. apriilimit 23. apriilimut, ullut taaneqartut ilanngullugit, Inatsisartut ataatsimiinnerat unikkallassaaq.
- Ulloq ataatsimiiffissatut kingullertut 5. juni 2019 naatsorsuutigineqarpoq.
UPA2019-imut atatillugu atortussat tamarmik www.inatsisartut.gl–imi takuneqarsinnaapput. Iluarsiissutit tamarmik nittartakkami ingerlaavartumik iluarsineqartassapput, taamaattorli suli periarfissaqarpoq atortussat tamaasa qarasaasiakkut tigusarusullugit nalunaarnissamut. Tamanna pillugu Laila Kristiansen lkri@inatsisartut.gl attaveqarfigineqarsinnaavoq.
Vivian Motzfeldt
Inatsisartut Siulittaasuat