2024 2023 2022 Flere år...
26-03-2019
Qeqertarsuup Tunuani ilisimasat pingaarutillit
Piffissami 6.-9. marts 2019 Inatsisartut Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliaat Qeqertarsuarmut Ilulissanullu paasisassarsiorluni angalavoq. Ataatsimiititaliap Qeqertarsuup Atuarfia, Atuarfik Mathias Storch, Arktisk Station, Perorsaanermik Ilinniarfik, Avannaata provsteqarfia, Majoriaq Ilulissat kiisalu Ilulissani Arsaattarfissuartaarniaqatigiit siulersuisui naapippaat. Angalaneq tamanna pillugu ataatsimiititaliaq ima oqaaseqassaaq:
Atuarfiit illuutaannut tunngasuni immikkut atuartitsinermi tunngasuni, peqataatitsinerup kingunerisaanik sulissussarsiortarnermi ajornartorsiutit kiisalu atuartut oqaatsitigut piginnaasamikkut unammilligassaat pillugit unammisassarpassuarnut takunnissinnaanerput annertusitillugu uterpugut. Atuarfiup ilisimasaminik ingerlatitseqqinnera nuannaarutigisorujussuuarput. Piffissami ungasinnerusumut atuartitaanermik nutarterinermik Naalakkersuisut suliaqarneranut nakkutilliinermi ilisimalikkavut tamakku atussavavut, taamaattorli peqatigisaanik ingerlaannartumik aaqqiiniarnerit nakkutigissavavut. Taamaattumik Ilinniartitaanermi nutarterinermik suliaqarnermut peqataanitta annertusinissaa kissaatigaarput aamma tamatumunnga atatillugu ataatsimiititaliap oqaloqatigiiffiusumik ataatsimiinnissamut qaaqqoreersimavaa.
Ukiuni arlalinni Ilulissani timersortarfissarsuaq eqqartorneqareersimavoq. Sumiiffimmi piumassuseqarluartut innuttaaqatiminnut sunniuteqarluartussanik sorsuutiginnittarneri inuiaqatigiinnut tamanna pitsaasuuvoq. Innuttaasut taamatut namminersuutigalugu suliniuteqartillugit tunngaviatigut tamatigut tapersersortussaavavut, minnerpaamillu inuiaqatigiittut takorluukkat tamakku akornusersornaveersaartussaallutigit.
Inatsisartut inatsisinik akuersisimatillugit, pingaaruteqarpoq inatsisip sunniutai kissaatigineqartutut atuunnersut ataavartumik malinnaavigissallugit. Allaffissornikut ingerlatsinermi aaqqissuussanerup pissusissamisoortuunera tamatumani aamma atuuppoq. Pineqartut taakku ilaatigut Avannaata Provsteqarfiani kiisalu Majoriaq Ilulissani oqaloqatigiissutigaavut. Inatsisiliornermi inatsisip aaqqissuussanera aammalu piginnaasat nunatsinneereersut qanoq atorneqarnersut qanoq atorneqarnerani innuttaasut pisariaqartitaat kiisalu innuttaasut akileraarutaat pissusissamisut atorneqarnersut tamatigorluinnaq salliutinneqartussaapput. Ilinniagaqarfiit ataasiakkaat misilittagaat pitsaasut piginnaasaallu atussavavut taamaattorli aamma nukissat tamakkiisumik atorneqartinnagit eqqortumik iliortussaalluta. Taamaalilluta suliffeqarfiit taakku pingasut inatsisiliuussimaneri allaffissornermilu ingerlatsinerat malinnaaffigissallugu aalajangiusimavarput.
Ataatsimut isigalugu ilisimasanik, misilittakkanik aammalu isumassarsianik avitseqateqarusunnerujussuaq misigivarput. Naggataatigut ullormi seqinnareqisumi Ilulissani avannaata qimussersuanut anngunniunnermi nuannaarnerujussuaq ataatsimiititaliap ilaasortaanut misigisaavoq nuannerluinnartoq.
Kultureqarnermut, ilinniartitaanermut, ilisimatusarnermut Ilageeqarnermullu ataatsimiititaliaq sinnerlugu
Doris J. Jensen
Ataatsimiititaliaq pillugu annerusumik paasisaqarusukkaanni www.ina.gl. atorlugu paasissutissanik pissarsisoqarsinnaavoq. Paasissutissanik annertunerusunik pissarserusukkaanni ataatsimiititaliap siulittaasua 539400-kut pissarsiarineqarsinnaavoq.