2024 2023 2022 Flere år...
29-03-2019
Aalisarnermut, Piniarnermut Nunalerinermullu Ataatsimiititaliami amerlanerussuteqartunit oqaaseqaat ataaniittoq oqaaseqaatigineqarpoq.
Inatsisartut Aalisarnermut, Piniarnermut, Nunalerinermullu Ataatsimiititaliaata matumuuna nalunaarutigaa Aalisarnermut, Piniarnermut, Nunalerinermullu Naalakkersuisoq piffissami kingullermi imminnut akerleriilluinnartunik arlaleriarluni Aalisarnermut Ataatsimiititaliamut innuttaasunullu paasissutissiisarsimasoq, tamannalu Aalisarnermut Ataatsimiititaliami ilaasortat naammaginngilluinnarlugu sakkortuumik uparuarpaat.
Tamanna Naalakkersuisup sullissinermini, soorlu aalisapiluttoqarneranik tusagassiuutitigut avammut oqaaseqariarluni (Sermitsiaq 15.2.2019), siunersiorneqarnermini ataatsimiititaliami ilaasortanit aalisapiluttoqarnersoq apeqqutigineqarmat, Naalakkersuisup aalisapiluttoqannginneranik akissuteqarsimaneranik ilaatigut toqqammaveqarpoq.
Tamanna Naalakkersuisup Aalisarnermut Ataatsimiititaliamit siunersiorneqarnermini matoqqasumi ulloq 20.3.2019 ingerlanneqartumi akissutigaa. Aalisarnermut Ataatsimiititaliami ilaasortat naliliinerat naapertorlugu Aalisarnermut Naalakkersuisoq imminnut akerleriilluinnartunik paasissutissiisimasutut nalilerneqarpoq.
Aammattaaq Aalisarneq pillugu Isumalioqatigiissitamut suliakkiissutip imarisaanik ilassuteqartoqarsinnaaneranik Aalisarnermut Naalakkersuisoq neriorsuisimasutut Aalisarnermut Ataatsimiititaliamit isumaqarfigineqarpoq, ataatsimiitsitaliami ilaasortat misigisimapput Naalakkersuisumit eqqortumik paasissutissinneqarsimanatik. Naalakkersuisummi ulloq 8.3.2019 nalunaarutigimmassuk Aalisarnermut Isumalioqatigiissitamut suliakkiissutip imarisaa naammassineqartoq. Tamanna tunngavigalugu ataatsimiititaliami ilaasortat isumaqarput Aalisarnermut Naalakkersuisumit qoqassineqarsimallutik.
Aalisarnermut Naalakkersuisup sullissinermini imminut pisussaaffiliunneqarsimasut uniorlugit oqaaseqartarsimasoq Aalisarnermut Ataatsimiitsitaliamit isumaqarfigineqarpoq.
Aalisarnermut Ataatsimiititaliap kissaatigaa Aalisarnermut Naalakkersuisoq eqqortumik ataatsimiititaliamut paasissutissiisassasoq, ataatsimiititaliap sulinera innarlerneqannginniassammat.
Henrik Fleischer
Aalisarnermut, Piniarnermut Nunalerinermullu Ataatsimiititaliami Siulittaasoq
Annertunerusumik paasisaqarumagaanni siulittaasoq oqarasuaammut uunga attavigineqarsinnaavoq +299 52 72 82