2024 2023 2022 Flere år...
29-03-2019
Nunatta avannaani qaleralinniarluni aalisarneq piujuaannartitsineq tunngavigalugu ingerlanneqartoq Aalisarnermut Naalakkersuisup nalilerpaa?
Aalisarnermut, Piniarnermut Nunalerinermullu Ataatsimiititaliami ikinnerussuteqartunit oqaaseqaat ataaniittoq oqaaseqaatigineqarpoq.
Kina aperinersoq apeqqutaatinneqarsimagunarpoq.
Inatsisartut Aalisarnermut Piniarnermut Nunalerinermullu Ataatsimiititaliaa ulloq 20. marts siunersiuisoqarnerani qaleralinniarneq piujuaannartitsissutaasinnaasoq Naalakkersuisup qularnaarpaa.
Sermitsiamili 15. februarimi allassimasumi atuarneqarsinnaavoq, Naalakkersuisoq Nikkulaat Jeremiassen ”nassuerpoq, Avannaani qaleralinniarnermi qaleraleqassutsip navianartumi inissisimaleqqajaasoq.” Qaammallu ataaseq qaangiutsitsiaannartoq, ulloq 25. januar, § 37 naapertorlugu Inatsisartunut akissuteqaammi ilisimatitsissutigaa, ukiuni arlalinni qalerallit ikiliartortut, aalisapiluttoqaneranillu uumassusilerisut misissuinerat ersarissumik takussutissiisoq.
Naalakkersuisup siunersiuinermi oqaaserisaanut ataqatigiissikkuminaapput.
Aalisarnermut Piniarnermut Nunalerinermullu Ataatsimiititaliap pingaartippaa, Aalisarnermut Piniarnermut Nunalerinermullu Naalakkersuisup nalunaarutigisartagai atuuttunik tunngaveqarlutillu eqqortumik tikkuussisarnissaat. Tamanna inuiaqatigiit Inatsisartullu piumasaqaatigaat.
Naliliinerit tamarmik taartuinnarsuullutilluunniit qaamasuinarsuusariaqanngillat; apeqqusernarsinnaasut assigiinngisitaartullu naatsorsuutigineqarsinnaasariaqarput – paasissutissammi tamakkiisumik isigineqarsinnaasariaqarput.
Aalisarnermulli Naalakkersuisoq siunersiuisoqarnerani akissutai Naalakkersuisup sapaatip akunneri arlallit sioqqullugu paasissutissanik saqqummiussineranut atassuserneqarsinnaanngippata, – taamaalillunilu uppernassutsi apeqqusernarsitillugu.
Taammaattoqarnera ataatsimiititaliamut, inuiaqatigiinnut Naalakkersuisumulluunniit imminermut iluaqutaanngilaq.
Taamaammat Aalisarnermut Piniarnermut Nunalerinermullu Ataatsimiititaliap Naalakkersuisoq oqaaserisimasaminik ersarissaanissaanik kaammattoqarpaa: Qalerallit aalisapilunneqarpat, qaleralinniarnerluunniit piujuaannartitsinermik tunngaveqarpa?
Henrik Fleischer
Aalisarnermut, Piniarnermut Nunalerinermullu Ataatsimiititaliami Siulittaasoq
Annertunerusumik paasisaqarumagaanni siulittaasoq oqarasuaammut uunga attavigineqarsinnaavoq +299 52 72 82