Nutaarsiassat

13-09-2019

Siulittaasoqarfiup attaveqaatitut ataatsimiititaliamik Danmarkimi ukiumoortumik ataatsimeeqateqarnera

Siulittaasoqarfik folketingip siulittaasoqarfia peqatigalugu attaveqaatitut ataatsimiititaliamik ukiumoortumik ataatsimeeqateqartarpoq. Ataatsimiinnerit Kalaallit Nunaata Danmarkillu akornanni paarlakaajaalluni ingerlanneqartarput.

Ukioq manna Danmarkimi Nordsjællandimi ulluni 27. – 29. august ingerlanneqarpoq suliffeqarfinnut arlalinnut pulaarneq pisussanut ilaalluni. Attaveqaatitut ataatsimiititaliap ataatsimiinnerani siulittaasoqarfimmit uku peqataapput: Inatsisartut Siulittaasuat Vivian Motzfeldt aamma siulittaasup tullii Mimi Karlsen, Peter Olsen aammalu Nikkulaat Jeremiassen kiisalu folketingip siulittaasoqarfianit peqataapput folketingip siulittaasua Henrik Dam Kristensen kiisalu folketingimi siulittaasut tullii Karen Ellemann, Pia Kjærsgaard aamma Trine Schøning Torp.

Taamaalilluni attaveqaatitut ataatsimiititaliap pulaarpaa Hillerødimi Novo Nordisk, tassani tikilluaqqusisuullutik CEO Lars Fruergaard Jørgensen, Corporate Vice President Henrik Rasmussen aamma Policy Lead Marie Hjortdal. Suliffeqarfik ilisaritinneqareermat Novo Nordisk Fondenip Danmarkimi Steno Centret pilersinneqarneranni suliai aammalu Kalaallit Nunaannik suleqateqarneq pillugit Head of Patient Care Jannik Hilstedimit attaveqaatitut ataatsimiititaliaq saqqummiivigineqarpoq. Taamaalilluni Novo nordisk Nuummi Steno Centerimik pilersitsinissaq pillugu Naalakkersuisunik suleqateqalerpoq, tassaasoq diabetesimik (sukkornermik) aammalu inooriaatsimik pissuteqartumik nappaatit pillugit nunatsinni tamarmi innuttaasunut sullissilluni ilisimasaqarfissaq nutaaq. Aammattaaq peqqissaaveqarfiup nutaap taassuma Dronning Ingridip Napparsimmavissua suleqatigissavaa.

Tamatuma saniatigut attaveqaatitut ataatsimiititaliap pulaarpaa Humlebækimi suliffeqarfik Coloplast, tassani tikilluaqqusisuulluni pisortaaneq Kristian Villumsen & siulersuisuni siulittaasoq Lars Rasmussen. Coloplast Danmarkimi Islandimilu suliassaqarfiit stomip (naakkut anarfiliisarneq), kontinensip (anassamik quussamillu nunusinnaaneq) aamma urologip (quup aqqutai) kiisalu amerissarnerup kilernernillu passussinerup iluini nittartaassisuuvoq napparsimanermilu atortunik tuniniaasuulluni. 

Suliffeqarfinnut pulaarnerit akornisigut attaveqaatitut ataatsimiititaliaq Rungstedgaardimi ukiumoortumik ataatsimiippoq, tamatumani ataatsimiititaliap ilaasortai Kalaallit Nunaanni Danmarkimilu inatsisartutigoortumik sulinermi killiffik pillugu paasissutissanik paarlaaqatigiittarlutik. Soorluttaaq folketingip aamma Inatsisartut akornanni inatsisartutigoortumik suleqatigiinnermi ataatsimut unammilligassat oqallisigineqarnissaannut periarfissaqarsimasoq. Tikeraarnerup nalaa tamaat amerikap præsidentiata tikeraarnissaraluaminik taamaatitsiinnarnera ersarissumik malunnaateqarpoq, tamannalu soorunami sumi tamani maluginiarneqarluni.

Nordsjællandimi tikeraarneq aallarnerneqarpoq Helsingørimi M/S Søfartsmuseumimut (umiartornermit katersugaasivik) paasisaqarfiulluartumik pulaarnikkut, tassani katersugaasiviup pisortaa Ulla Tofte takornariartitsisuulluni aammalu Knud Rasmussenip Hundestedimi illuanut pulaarnermik pissanganartumik soqutiginartumillu attaveqaatitut ataatsimiititaliap tikeraarnera naggaserneqarpoq, tamatumani attaveqaatitut ataatsimiititaliaq katersugaasiviup pisortaanit Søren La Cour Jensenimit katersugaasivimmi takornariartinneqarluni.

Attaveqaatitut ataatsimiititaliaq tulliani ataatsimiissaaq aggustimi Kalaallit Nunaanni.

Inussiarnersumik inuulluaqqusillunga

Vivian Motzfeldt

Inatsisartut Siulittaasuat