2024 2023 2022 Flere år...
13-09-2019
Nunanut Allanut Sillimaniarnermullu ataatsimiititaliap Kangerlussuarmi mittarfiup siunissami atorneqarnissaanut itisilerlugit apeqqutai.
Nunanut Allanut Sillimaniarnermullu ataatsimiititaliap Ineqarnermut Attaveqaqatigiinnermullu Naalakkersuisumik ulloq 12. september ataatsikkoortumik ataatsimeeqateqarneq tunngavigalugu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisumut apeqqutit arlallit nassiuppai.
Illersornissamut Ministerip Tine Bramsenip Folketingimi Kalaallit Nunaannut ataatsimiititaliamit siunersiorneqarnera pissutigalugu ataatsikkoortumik ataatsimeeqateqarneq pisimavoq. Siunersiuinermi Kangerlussuarmi mittarfiup siunissami atorneqarnissaa pineqarpoq. Kalaallit Nunaannut ataatsimiititaliamit kissaatigineqarsimavoq ilisimatinneqarnissaq, tamaatut ingerlaannartumik mittarfimmik atuineq qanoq aningaasalersorneqassanersoq, kikkullu aningaasaliisuussanersut. Ammasumik siunersiuinermi Folketingimi Kalaallit Nunaannut ataatsimiititaliap apeqqutigisimavaa:
”Mittarfiit Ilulissani Nuummilu nutaat atuutilerpata, Ministerip Kangerlussuaq Illersornermut atatiinnarnissaanut kissaat pillugu qanoq ilisimatitsisinnaava? Ilanngullugu, illersornissaqarfiup Kangerlussuaq atatiinnassappasuk aningaasaliinissat qanoq annertutiginersoq, kiallu aningaasaliiffigissanerai paaserusuppaat?”
Illersornissamut ministerip ammasumik siunersiuisoqarnerani ilisimatitsissutigaa Kangerlussuaq matuniarneqanngitsoq. Tamatumunngalu pissutaasoq mittarfik illersornissaqarfiup timmisartuinut pingaaruteqarnera. Illersornissamut ministerip ilisimatitsissutigaa aamma, ukiap ingerlanerani Kangerlussuaq pillugu siunniussaqarnermik isumaqatigiissut saqqummiunneqarumaartoq kingusinnerusukkullu ilusilersugaq saqqummiunneqarluni.
Apeqqutinut taakkununnga uiggiullugu Nunanut Allanut Sillimaniarnermullu Ataatsimiititaliaq Naalakkersuisumut arlalinnik apeqquteqarsimavoq. Danskit Naalakkersuisuisa Naalakkersuisullu akornanni siunniussaqarnermik isumaqatigiissut Immikkut ittumik soqutigalugu apeqqutigisimavaat.
Nunanut Allanut Sillimaniarnermullu Ataatsimiititaliaq
Sinnerlugu
Aleqa Hammond
Ataatsimiititaliap siulittaasua
Annerusumik paasissutissat pillugit ataatsimiititaliap siulittaasua saaffigineqarsinnaavoq (+299 49 23 09) aamma
Ataatsimiititaliap siulittaasuata tullia Peter Olsen (+299 48 66 88) attavigineqarsinnaapput