2024 2023 2022 Flere år...
17-10-2019
Nunanut Allanut Sillimaniarnermullu Ataatsimiititaliap Artic Circle Assembly 2019-imi peqataavoq oqallinnerlu amarlugu saqqummiuppaa namminersuleriartornermi Kalaalit Nunaanni sillimaniarnikkut unammilligassat.
Artic Circle Assembly-mi Reykjavikimi pisumi Inatsisartut Nunanut Allanut Sillimaniarnermullu Ataatsimiititaliaa siullermeerluni nammineq oqallitsitsivoq. Oqallinneq ’breakout-session’ ataatsimiititaliap pilersaarusiuussimavaa, tassanilu ataatsimiititaliamit peqataasut Aleqa Hammond, Mimi Karlsen aama Pele Broberg isiginnaartullu akornanni oqallinneq aaqqissuunneqarsimalluni. Ataatsimiititaliap aaqqissuussinerata immikkut soqutigineqarluarsimanera takuneqarsinnaasimavoq inersuaq ’Norðurljós’ inunnik ulikkaavissimammat.
Issittumi Kalaallillu Nunaanni sillimaniarnikkut pissutsit allanngoriartornerat pillugit ataatsimiititaliap siulittaasuata Aleqa Hammondip oqallinneq aallarnerlugu tunngavilerpaa. Kalaallit Nunaanni eqqaanilu sikup sukkaqisumik aakkiartorneratigut umiarsuit angallannerannik ammaassivoq, Ruslandip sakkussiornikkut sakkortusaavoq inuillu issittumi najugaqartut puigorneqakulapput, aamma sikuittoq kujallermi isumaqatigiissutip assigisaanik issittumi isumaqatigiissusiornissap oqallisigineqarnerani.
Kalaallit immikkut inooriaasiat ataatsimiititaliami siulittaasup tulliata Mimi Karlsenip erseqqissaatigaa. Pinngortitamut qanilluinnarluni inuuneq aammali eqqissilluni inuuneq. Siulittaasup tulliata nunat tamat akornanni suleqatigiinnermi silap pissusiata allanngoriartornerata akiorniarnerani issittumi eqqissinerup pisariaqarluinnarnera naqissuserpaa, inuiaqatigiillu kalaallit namminiilivikkiartornerminni sulinerat aamma qulakkeerneqaqqullugu.
Naggataatigut ataatsimiititaliamut ilaasortap Pele Brobergip eqqaavaa Kalaallit Nunaat pisiarerusullugu Amerikamiut præsidentiata Donald Trumpip soqutiginninnini ersersitsinera alaatsinaannermillu annertoqisumik pilersitsinera tassuuna eqqaavaa. Pisimasumut ataatsimiititaliami ilasortat isumaat ataatsimeersuartut akornanni soqutigineqarluartoq ersarippoq. Pisinariumaninnerugaluaq naalakkersuinikkut sillimaniarnikkut unammilligassanut pingaartitsineq sunniutigivaa tamannalu immikkut soqutigineqarluni isiginiarneqarsimavoq.
Saqqummiinerit kingornatigut ataatsimiititaliamut ilaasortat peqatigalugit soqutiginnillutik peqataasorpassuit akornanni oqallinneqarpoq. Annerusumik eqqissineq namminiilivinnissarlu isiginnaartut akornanni ersarissumik isumaqatigineqarpoq. Isiginnaartullu akornanni Kalaallit Nunaata issittullu siunissami unammilligaat paasineqarluarput, soqutiginartumillu unammilligassat qanoq suliarineqarsinnaaneri pillugit ilanngusseqataapput.
Nunanut Allanut Sillimaniarnermullu Ataatsimiititaliaq sinnerlugu
Aleqa Hammond
Nunanut Allanut Sillimaniarnermullu Ataatsimiititaliap siulittaasua
Paasissutissanik allanik piniaraanni ataatsimiititaliap siulittaasua attavigineqarsinnaavoq oqarasuaatikkut +299 49 23 09