2024 2023 2022 Flere år...
31-01-2020
Inatsisartuni siunersiuinerit ammasut
Ammasumik siunersiuinissamut periarfissap ataatsimiititaliamit siullermeertumik ulloq 27. januar 2020-mi atorneqarsimanera aammalu tamatuma tamanit pitsaasutut nalilerneqarsimanera nuannaarutissaavoq.
Ammasumik siunersiuisinnaaneq 2008-mi Inatsisartut ukiakkut ataatsimiinneranni Inatsisartut Suleriaasiata allanngortinneqarneratigut periarfissaalerpoq. Taamaalillunilu periarfissaq ukiut aqqaneq marluk matuma siorna suleriaatsimut ilanngunneqarpoq.
Ataatsimiititaliat tamarmik ammasumik siunersiuisinnaapput aammalu ammasumik siunersiuisoqassanersoq ataatsimiititaliat namminneq aalajangigassaraat.
Aammattaaq suleriaatsimi allassimavoq ammasumik siunersiuinerit tamanut ammasumik ingerlanneqartut immiussissutinut immiussissutinulluunniit assigisaannut immiunneqassasut.
Ammasumilli siullermeertumik siunersiuinerup ingerlanneqarnerani pissutsit marlussuit erseqqissaatigineqarnissaat pisariaqarpoq.
Inatsisartut siunersiuinermik ammasumik siullermeertumik ingerlatsimmata taamatut ataatsimiinnermut Inatsisartunit atugassarititaasut aamma siullermeertumik misilinneqarput.
Ataatsimiinnerup ingerlanneqarnerani ilaasortanut aammalu Naalakkersuisunit peqataasunut atugassarititaasut, tassungalu ilanngullugu oqalutseqarnermi oqarasuaateqarnermilu teknikikkut piumasaqaatit aammalu teknikikkut atugassarititaasut allat Inatsisartunit qulakkeerneqartussaapput.
Ataatsimiititaliamut ilaasortat ilaat ammasumik siunersiuinermi Nuummiissinnaatinnagit ilaasortat peqataanissaat qulakkeerniarlugu teknikikkut atortorissaarutinut piumasaqaatit annertusariaqarput, tamannalu soorunami assut pingaartinneqarpoq.
Tulliullugulu ataatsimiinnermi najuunnissamik kissaateqartut atugassarisaat aammalu ataatsimiittunut nipiliornikkut akornusersuutaanngitsumik isersimasinnaanissaat qulakkeerneqassapput. Inatsisartut ataatsimiittarfii marluk mikisuararsuupput, tamannalu ammasumik siunersiuisoqarnerani najuukkusuttunut neqeroorutigineqarsinnaasunik killiliivoq.
Taamatut ataatsimiinnermi ilaatigut immiussinissamut ilaatigullu nalunaaruteqarnissamut tusagassiortut pisariaqartitsissapput, soorlu ulloq 27. januar ammasumik siunersiuisoqarnerani aamma taamaattoq. Tassanimi KNR-imeersut atortorissaarutitik nassarlugit najuummata siunersiuinerlu immiullugu. Tamanna Inatsisartut inissatigut atugassarisaannut aamma piumasaqaateqarfiuvoq.
KNR-ili toqqaannartumik aallakaatitsissanersoq Inatsisartunit aalajangerneqartussanngilaq. Tamanna KNR-ip nammineerluinnarluni aalajangigassaraa.
Taamaalillunilu inissatigut maleruagassatigullu Inatsisartut Suleriaasianni periarfissiissutigineqartut malillugit ammasumik siunersiuineq siulleq ingerlanneqarpoq. Taamaalillunilu Inatsisartut ataatsimiittarfii marluusut toqqaannartumik aallakaatitsinissamut atortulersugaanngillat, soorluttaaq ammasumik siunersiuinermit toqqaannartumik internetikkut aallakaatitsisoqassappat oqaatsinut marlunnut marlunnik kanaaleqarnissaq qulakkeerneqartariaqassasoq.
Ilaatigut ataatsimiinnerit Inatsisartuni inissatigut atugassarititaasut naapertorlugit ilaatigullu siunertarineqartutut ingerlanneqarnissaat qulakkeerneqaqqullugu ammasumik siunersiuineq siulleq soorunami nalilersuiffigineqarumaarpoq.
Maannangaaq oqaatigisariaqarpoq ammasumik siunersiuineq pitsaasumik pilersaarutaasutullu aammalu siunersiuinerit ammasut ingerlanneqarsinnaasunngortinneqarneranni siunertarineqartoq malillugu ingerlammat.
Vivian Motzfeldt
Inatsisartut Siulittaasuat/ Formanden for Inatsisartut