2024 2023 2022 Flere år...
05-03-2020
Daniel Skiftemut eqqaaniut
Inatsisartut Siulittaasorisimasaat Daniel Skifte pingasunngornermi ulloq 4. marts 2020, 84-inik ukioqarluni toqukkut qimaguppoq.
Danieli piniartukkormiut kinguaavisa 50-ikkunni qaffasinnerusumik ilinniagaqarnissamik toqqaasimasut ikitsunnguit ilagaat, tassa 1956-imiit 1961-imut Ranumimi ilinniartitsisutut ilinniarnissani toqqaramiuk, tamatumalu kingorna piffissami 1961-imiit 1965-imut Lyngby-Taarbækimi ilinniartitsisuusimalluni. Kalaallit amerlanerpaat ilinniarnissamik isumaliuteqanngikkallarfianni Danielip aqqutinik nutaanik nassaarsiornissamut qanoq piumassuseqartigineranut tamanna ersiutaavoq.
Danieli timersoqatigiiffilerinermi maligassiuisuuvoq, tassami 1967-imi sisorartartut peqatigiiffiannik siullerpaamik NSP-mik pilersitsisuusimavoq, Sulorartartut Kattuffiannik, Kalaallit Arsaattartut Kattuffiannik, Sisorartartut Kattuffiannik kiisalu Timersoqatigiiffiit Assammik Arsartartut Kattuffiannik pilersitseqataasimalluni. Aamma inuusukkallarami timersornermik aallussilluarsimavoq, tassami Østrigimi, Innsbrukkimi ukiuunerani OL-imi, peqataasut nunani 36-ineersut 1100-t missaanniittut peqataaffigisaanni ujakkaarluni peqataagami.
Daniel Skifte 1982-imi aallartilluni naalakkersuinikkut suliaqarsimaneranut qujaniutitut Namminersorlutik Oqartussat Nersornaasiuttagaannik akimanerpaamik kuultiusumik 2015-imi Nersornaaserneqarpoq.
Naalakkersuinikkut suliaqarnera 1995-imi Inatsisartunut qinigaagami aallartilluarpoq, piffissami marts 1995-imiit marts 1999-imut Aningaasaqarnermut Ineqarnermullu Naalakkersuisuusimalluni. Naalakkersuinikkut suliaqarnermini ukiumi kingullermi 2001-imiit 2002-mut Inatsisartunut Siulittaasuusimavoq, tamatuma kingorna 66-inik ukioqarluni naalakkersuinermik suliaqarnerminiit tunuarluni.
Danielip ukiorpassuarni naalakkersuinikkut suliaqarsimanermi saniatigut pissuserissuunini, inussiarnerluinnartuunini inoqamminullu ataqqinnittuunini ilisimaneqaatigai.
Eqqaaneqarnera ataqqinartuuli.
Inussiarnersumik inuulluaqqusillunga
Vivian Motzfeldt