2024 2023 2022 Flere år...
06-03-2020
Angutit arnallu naligiissitaanissaat pillugu inatsisip eqquutsinneqarnissaa
Kanngunarsaalluni pissusilersornernik suliat arlallit tusagassiorfinnit eqqartorneqartut pillugit sapaatip akunneq kingulleq oqallinneq Siulittaasoqarfimmit isumakulunnartillugu malinnaavigineqarpoq.
Tassunga atatillugu Siulittaasoqarfimmit erseqqilluinnartumik naqissuserneqassaaq angutit arnallu naligiissitaanissaat pillugu inatsit inuiaqatigiinni tamani aammalu soorunami Inatsisartuni isiginiarneqassammat malinneqarlunilu. Innuttaasut akornanni kanngunarsaalluni pissusilersornerit qanorluunniit ittut Siulittaasoqarfimmit akuersaarneqanngilluinnarput.
Taamaalillunilu Inatsisartut ataanniipput innuttaasunit qinigaallutik Inatsisartunut ilaasortanut allattoqarfik kiisalu peqatigiiffiit namminersortut arfineq marluk, tassaasut partiit naalakkersuinermik suliaqartuusut aammalu namminneq iluminnik pissutsinik aqutsisut. Taamaalillutillu Inatsisartut suliffeqarfiuvoq angisooq inatsisitigut immikkut isigineqarsinnaasunik namminersortunik amerlasuunik immikkoortortalik.
Taamaattumillu Siulittaasoqarfimmit erseqqissarumaneqarpoq Inatsisartuni sulisut qinikkallu toqqissisimallutik sulisinnaanissaat aammalu ataqqinnittumik pissusilersorlutik imminnut mianerisinnaanissaat pingaaruteqarmat.
Angutit arnallu naligiissitaanissaat pillugu inatsimmi ima allassimavoq:
- 1. Inatsisip siunertarivaa arnat angutillu naligiissitaanerisa siuarsarnissaat, ataatsimoortumillu isumaqatigiinniarnerni pisinnaatitaaffiit assigisaat pitsaanerusulluunniit anguneqanngiffiini atorneqassalluni.
- 2. Arnat angutilluunniit suiaassusaat pissutigalugu toqqaannartumik toqqaannanngitsumillu assigiinngisinneqarnissaat inerteqqutaavoq.
Imm. 2. Arnanik angutinilluunniit peqqusiileqisitsineq kinguaassiuutitigulluunniit peqqusiileqisitsineq aammattaaq inerteqqutaapput.
- 4. Inuup ataqqinassusiata kanngunarsarnissaanik sunniuteqartumik siunertaqartumilluunniit, aamma pineqartumut qunusaarinnippaluttumik, akeqqersimaartumik, nikassaarpasissumik, nikanarsaarpasissumik nuanniitsumillu misigisimalersitsilluni inuup suiaassusia inuk akuttunngitsumik, naapertuutinngittumillu pineqaraangat peqqusiileqisitsisoqartarpoq.
Imm. 2. Inuk kinguaassiuutinut attuumassuteqartunik pissusilersuutinik piumassuserinngisaanik nalaataqartinneqaraangat, inuup pineqartup kanngunarsarnissaanik, nikanarsarnissaanik, assigiinngisinneqarnissaanik imaluunniit nukillaarsarnissaanik sunniuteqartumik siunertaqartumilluunniit, kinguaassiuutitigut peqqusiileqisitsisoqartarpoq.
Suiaassutsit akornanni kanngunarsaannginnissaq pillugu inatsit pisariaqartoq pigineqarmat aammalu taanna inatsisip anersaava siunertaalu malillugu eqquutsinneqartussaammat qularutigineqarsinnaanngilaq.
Siulittaasoqarfimmilli aamma oqaatigineqassaaq ileqqorissaarnissaq pillugu malittarisassanut ilitsersuummik nalinginnaasumik atorsinnaasumillu aammalu Inatsisartut ataanni suliffeqarfinnut tamanut atuutsinneqartariaqartumik pisariaqartitsisoqarmat, taamaattumillu partiit suleqatigalugit suliaq taanna Siulittaasoqarfimmit aallartinneqassaaq.
Sulianulli tusagassiorfinnit allaaserineqartunut tunngatillugu Siulittaasoqarfimmit ajuusaarutigalugu oqaatigineqassaaq Siulittaasoqarfik pillugu oqaatigineqartut tunngavissaqanngitsut tigussaanngitsullu aammalu Siulittaasoqarfimmit ilisarineqarsinnaanngitsut amerlammata.
Angutit arnallu naligiissitaanissaat pillugu inatsimmik malinninnginneq pillugu maanna oqallinneq innersuussutigalugu siunissamut isigisumik Siulittaasoqarfik sulissuteqalersaarpoq, taamaalilluni Inatsisartut ataanni suliffimminni sulisut tamarmik toqqissisimasinnaaqqullugit.
Qanoq ilusilimmik Siulittaasoqarfimmut tunniunneqarnerat apeqqutaatinnagu suliassat Siulittaasoqarfimmut saqqummiunneqartut tamaasa Siulittaasoqarfiup pisarnermisut suliarisassavai. Aammali inunnut tunngasumik suliat suliallu ataasiakkaat tamanit oqallisigineqarnissaminnut naleqqutinngitsut Siulittaasoqarfimmit aamma mianeriniarneqassapput.
Vivian Motzfeldt
Inatsisartut Siulittaasuat