2024 2023 2022 Flere år...
12-03-2020
Sermitsiamut naqqiut / Inatsisartuni mailinut serverinik allanngortitsineq
“Inatsisartuni IT-mut tunngatillugu paatsiveeruttoqartoq” Sermitsiap internetikkut tusagassiorfianit oqaatigineqarpoq.
Eqqortussaq pillugu paasissutissiissutigineqassaaq allattoqarfiup partiillu akornanni serverit immikkoortinneqarnerat sapaammi ulloq 8. marts, nal. 17.00 aallartinneqarmat. Tamanna piffissami sivisuumi pilersaarusiorneqarsimavoq ullorlu pineqartoq naammassineqartussatut naatsorsuutigineqarluni.
Emailit tigunissaat nassiunnissaallu ajornartorsiutaasoq ataasinngornermi ulloq 9. marts paasineqarpoq, tamatumalu aaqqiiviginissaa ingerlaannartumik sulissutigineqalerpoq marlunngornermilu ullaap tungaa aaqqinneqarluni. Taamaattoqarnerani partiit allattoqarfiullu akornanni digitalinngorlugit paasissutissanik avitseqateqarnissamut periarfissaqartuarsimavoq, soorluttaaq illuatungeriit illorsuarmi ataatsimi inissisimasut imminnullu ornilertorsinnaasut. Taamaattumillu piffissami taaneqartumi partiit allattoqarfiullu akornanni digitalinngorlugit paasissutissanik avitseqateqarnissamut periarfissat allat pilersinneqarput.
Kiisalu eqqortuunngilaq ulloq tunniussivissaq tassaasoq sisamanngorneq. Suliassanut oqaluuserisassatut ilanngutitikkumasanut tunniussivissaq tassaavoq tallimanngorneq ulloq 13. marts, nal. 12.00.
Taamaalillunilu Inatsisartuni IT-mut tunngatillugu paatsiveeruttoqanngilaq.
Allanngortitsinerulli akornutaasimasinnaanera iliuuseqarfigiumallugu partiit tunniussinissaannut killiliussap arfininngornermi ulloq 14 marts, nal. 16.00-imut sivitsorneqarnissaata immikkut akuersissutigineqarnissaa Siulittaasoqarfimmit aalajangiunneqarpoq.