Nutaarsiassat

18-03-2020

Inatsisartut upernaakkut ataatsimiinnissaannik kinguartitsineq

COVID19 pillugu Nuummi peqqussutit pissutsillu sakkortuumik sukateriffigineqarnerat tunngavigalugu Inatsisartut Siulittaasuata partiit siulittaasui tamaasa suleqatigiissitsisullu Inatsisartunut ilaasortaatitaat ullumi ataatsimeeqatigai. Taamaalillutillu Nuummi pissutsit sukateriffigineqarnerat tunngavigalugu Inatsisartut upernaakkut ataatsimiinnissaata kinguartinneqarnissaa partiit tamarmik tamakkiisumik taperserpaat.

Taamaalillunilu Tunillaassortunik Nappaalanersuaqarneranut Ataatsimiititaliarsuaq ulloq 18. marts 2020-mi ima kaammattuuteqarpoq:

”Tunillaassortunik nappaalanersuaqarneranut ataatsimiititaliarsuaq ileqqorisassatut maleruagassat tullinnguuttut ullumikkut nal. 16 atuutilissasut aalajangerpoq:

• Nuummi aaqqissuussinerit inunnik qulinik amerlanerusunik peqataaffigineqartussat inerteqqutigineqalerput. Matumani aaqqissuussat illup iluani silamilu pisussat pineqarput. Inerteqquteqarneq ullumikkumiit sapaatillu akunnerini pingasuni atuuttussatut aalajangerneqarpoq.
• Nuummi Nuuk centeri, diskotekit, imerniartarfiit timersortarfiillu, tassunga ilanngullugit timigissartarfiit matuneqassapput.
• Nuummi neriniartarfinnut cafeenullu isertoqaqqusaanngilaq. Illumiit annissassanik pajuttarnerit suli inerteqqutaanngillat.
• Nuummiit angallannerit suulluunniit, tassunga ilanngullugit nammineq angallammik angalanerit inerteqqutaalerput.
• Nuummi ilinniarfeqarfiit tamarmik taamatuttaaq pisortat namminersortullu ulluunerani paaqqinnittarfii matuneqassapput. Pinasuartumik paaqqutarinninnissat aaqqissuunneqarput.
• Ulluinnarni nioqqutissanik pisiniarfiit nalinginnaasumik ammaannarput. Pisisartulli 2 meterinik imminnut ungasitsigisassapput.”

Tamatuma kingorna suliaq pillugu Siulittaasoqarfik ataatsimiippoq tamannalu tunngavigalugu Suleriaaseq pillugu Ataatsimiititaliamut inassutigalugu Inatsisartut upernaakkut ataatsimiinnissaat qaammammik ataasiugallartumik kinguartinneqassasoq. COVID19 pillugu Nuummi ineriartorneq Siulittaasoqarfimmit qanimut malinnaaffigineqassaaq aammalu Tunillaassortunik Nappaalanersuaqarneranut Ataatsimiititaliarsuup pissutsit pillugit sukaterilluni aalajangersagai malinneqassallutik.

Taamaalillunilu Inatsisartut ataatsimiinnissaanik pilersaarutaasumik kinguartitsineq qaammatip ataatsip qaangiunnerani sivitsoqqinneqarsinnaassaaq.

Taamaalilluni pissutsit Nuummi sukateriffigineqartut Siulittaasoqarfimmi malinneqarput, taamaattumillu innuttaasut Nuummit Nuummullu sapaatip akunnerini tullerni pingasuni angalasinnaassanatik, soorluttaaq suliffeqarfinni sulisut ataatsikkut ataatsimoorsinnaasut annerpaamik quliusinnaanissaannik aalajangersaalluni sukaterisoqartoq.

Taamatullu Suleriaaseq pillugu Ataatsimiititaliaq suliaq pillugu aamma ataatsimiippoq aammalu Inatsisartut upernaakkut ataatsimiinnissaata kinguartinneqarnissaanik Siulittaasoqarfiup inassuteqaataa Suleriaaseq pillugu Ataatsimiititaliamit isumaqatigiittumit akuerineqarpoq.

Ajornartorsiutaalersinnaasut nutaat ilisimaneqanngitsullu maanna pissutsit pisariaqalersissinnaasaat suleriaatsimi sillimaffigineqanngimmata COVID19 pillugu ineriartorneq qanimut malinnaaffigineqassaaq aammalu pissutsit pisariaqalersitaat malillugit inatsisiliortut ingerlasinnaanissaat qulakkeerneqarsinnaaqqullugu Inatsisartunit iliuuserineqartariaqartut Inatsisartunit malitseqartinneqassallutik.

Vivian Motzfeldt

Inatsisartut Siulittaasuat