Nutaarsiassat


2020 2019 2018 Flere år...

27-03-2020

Inatsisartut 2020-mi immikkut ittumik ataatsimiinnerat - IIA20

Inatsisartut immikkut ittumik ataatsimiinnissaanni immikkoortut oqaluuserisassanut ilanngunneqartussatut kissaatigineqartut Siulittaasoqarfimmit ullumi oqaluuserineqarput Inatsisartullu ataatsimiinnerata ullussaa aalajangiunneqarluni.

 

Nuummi killilersuutit tamanut peqqussutigineqartut aamma Inatsisartut allaffeqarfiannut atuupput, taamaattumillu Inatsisartut immikkut ittumik ataatsimiinnissaata iliuutsinik nutaarluinnarnik amerlasuunik imaqartup allaffimmi sulisut ikittuinnaat atorlugit ingerlanniarneqarnera unammillernartoqarsimavoq.

 

IIA20-p ullussaa

Taamaalillunilu Inatsisartut immikkut ittumik ataatsimiinnissaat immikkorluinnaq atugassaqartitsilluni ingerlanneqassaaq ulloq 1. april 2020, nal. 11.00. Ulloq ataatsimiiffiusoq ataasiinnaassaaq. Inatsisissatut siunnersuut ulloq taanna siullermeerneqartussaq, aappassaaneerneqartussaq pingajussaaneerneqartussarlu nalunaarutigineqarpoq.

 

Ataatsimiittarfimmut ornigulluni ataatsimiigiarnissamik piumasaqaat

Assersuutigalugu skype imaluunniit mailikkut taasineq atorlugu ungasianit peqataasinnaaneq aporfissaqarnersoq apeqqutigineqarsimavoq.

 

Tamanna inatsisikkut periarfissinneqanngilaq.

 

Inatsisartut Naalakkersuisullu pillugit Inatsisartut inatsisaanni § 8, imm. 1, oqaaseqatigiit siullerni aalajangersarneqarpoq:

 

 ”Inatsisartut aalajangiisinnaassuseqarput ikinnerpaamik ilaasortat affaat najuuppata.”

 

Aalajangersakkamut inatsimmi nassuiaatini ilaatigut ima paasissutissiisoqarpoq:

 

Aalajangersagaq […] Inatsisartut aalajangiisinnaassuseqassappata ilaasortat ikinnerpaamik affaat najuutissasut, imatut paasillugu Inatsisartut ataatsimiittarfianni najuutissasut. Piumasaqaat taanna saneqqunneqarsinnaanngilaq, taamaattumillu ajornartorsiulernermi ajunaarnersuaqarneraniluunniit assersuutigalugu angallannerup isasoorfigisimasaani aamma atuulluni. Ilimagisariaqarporli Naalakkersuisut pisumi taamatut immikkorluinnaq ittumi inuiaqatigiinni suliassat inuuniarnermut pingaaruteqarluinnartut ingerlaannarnissaat qulakkeerniarlugu pisariaqarumaartunik iliuuseqarsinnaassasut.”

 

Sinniisussanik aggersaaneq

Inatsisartunut ilaasortat Nuummi najugaqartut 13-iinnaammata Inatsisartullu aalajangiisinnaassuseqarnissaannut ilaasortat ataatsimiittarfimmiittut ikinnerpaamik 16-iunissaat pisariaqarmat pissutsit taamaanneranni partiit tamarmik sapinngisamik pitsaanerpaamik sinniisuutitaqarnissaat Siulittaasoqarfimmit aalajangiunneqarpoq, taamaattumillu taasisarneq pillugu isumaqatigiissuteqarneq, najuutinngikkallarnissat aammalu piffissami sivikitsumi sulinngiffeqarallarnerit akuleriisillugit atorneqarnissaat pisariaqassaaq, taamaaliornikkut qulakkeerneqarsinnaaqqullugu ilaasortat taasisinnaasut Inatsisartut ataatsimiittarfianni 16-iunissaat.

 

Taamaattumillu Siulittaasoqarfimmut aalajangiisuulluinnarsimavoq COVID19 pillugu killilersuutit malillugit Inatsisartut aalajangiisinnaassuseqarnerisa qulakkeerneqarnissaa aammalu sinniisunik aallaavittut isigalugu Nuummi najugaqartunik Nuummiittunillu aggersaanissaq.

 

Inatsisartut ataatsimiittarfianni ataatsimiinnerullu ingerlanneqarnerani malittarisassat

Ataatsimiinnerup pitsaanerpaamik atugassaqartitsilluni ingerlanneqarnissaani ataatsimiittarfimmi eqqaanilu malittarisassat uku malinneqarnissaat aamma piariaqassaaq:

 

  • Ataatsimiittarfik piareersarneqassaaq aatsaallu ataatsimiinnissaq minutsinik 15-inik sioqqullugu ilaasortanit iserfigineqarsinnaanissaminut ammarneqassalluni

 

  • Ataatsikkut ataatsimiittarfimmittut amerlanerpaamik quliusinnaapput

 

  • Ataatsimiittarfimmiittut qulit pineqartut tassaassapput Inatsisartut Siulittaasuat ataatsimiinnermilu aqutsisumut allati, Naalakkersuisut Siulittaasuat imaluunniit Naalakkersuisunut ilaasortaq alla (taamaattorli ataasiakkaarlutik) kiisalu partiinit ataasiakkaanit oqaaseqartartut arfineq marluk (ataatsimiittarfimmi piffissaq atorneqartussaq partiit namminneq agguataassavaat, taamaattorli ataatsimiittarfimmi inuit amerlanerpaamik quliusinnaanerat malissallugu)

 

  • Ataatsimiittarfik pitsaanerpaamik atorluarneqarsinnaaqqullugu ilaasortallu annertunerpaamik akunneqarsinnaaqqullugit ilaasortat 16-it inissanik nutaanik tunineqassapput – taamaattorli ataatsikkut ataatsimiittarfimmiittarfimmiittut quliinnaassapput

 

  • Tunuleriiaat sisamakkaat marluupput, taamaalillunilu nerriviit isuini ataasiakkaani ilaasortat ataasiakkaarlugit inissinnissaannut periarfissaqarpoq aammalu issiavinni ataasiakkaani imermik ilisisoqassalluni

 

  • Inissaminnukarnerminni aniartornerminnilu ilaasortat aqqut naannerpaaq toqqassavaat

 

  • Oqaaseqartartut oqaluttarfimmit saqqummiissapput

 

  • Issiavigisamit apeqquteqartoqartassaaq
  • Taasinerit ingerlanneqarneranni inuit ataatsimiittarfimmiittut quliuinnassapput – tassa ilaasortat arfineq pingasut aammalu ataatsimiinnermik aqutsisoq allatsilu. Siulliit taasereerunik ataatsimiittarfik qimassavaat tulliilu taasiartorlutik isissallutik.

 

  • Avataaneersut, tusagassiortut atorfilittallu ataatsimiittarfimmut isersinnaanerat periarfissaassanngilaq. Internet tv-lu aqqutigalugit ataatsimiittarfimmi ataatsimiinnermik malinnaanissaq innersuussutigineqarpoq

 

  • Ataatsimiittarfimmut isersinnaasut amerlanerpaamik quliunissaannik qulakkeerinninnissamut ataatsimiittarfiup silataani aatsisartumik issiasoqassaaq

 

  • Ilaasortat ataatsimiittarfimmiinngitsut allaffimminniittariaqarput tassanngaanniillu oqallinnermik malinnaallutik

 

  • Tunillaasinnaasut sapinngisamik killilersimaarniarlugit imermik sassaalliinerup saniatigut ataatsimiittarfimmi allanik sassaallertoqassanngilaq

 

  • Kaffisortarfik matoqqassaaq

 

Oqalutsit oqaluttaasarfianni oqaluttaasoq kisimiissaaq.

Ataatsimiittarfimmi ataatsimiinnissamut atortussat tamarmik qarasaasiakkut agguaanneqassapput.

Naggataarutaasumik oqaaseqaatit inassuteqaallu

Allakkiami matumani tamassi takusinnaasassitut tamatta aatsaat taamatut misilitassinneqarpugut. Inatsisartut immikkut ataatsimiinnerat sutigut tamatigut immikkorluinnaq atugassaqartitsiffiulluni ingerlanneqassaaq.

 

IIA20-mut atortussat tamarmiusut pisarnertut Inatsisartut nittartagaat una aqqutigalugu pissarsiarineqarsinnaassapput: www.ina.gl

 

 

Inussiarnersumik inuulluaqqusillunga

 

Vivian Motzfeldt

Inatsisartut Siulittaasuat