Nutaarsiassat


2020 2019 2018 Flere år...

08-04-2020

Kalaallit Nunaanni tv-mut umeruarsuit tusaamasaanersaat ippassaq soraarninngortitaavoq.

 

Inatsisartut ataatsimiittarfiata umeruarsuanik annissinermi inuit arfineq marluk akiartorineqartut

 

Kalaallit Nunaanni tv-mut umersuit tusaamasaanersaat immaqalu pingaarnersaat ippassaq peerneqarpoq. Inatsisartut ataatsimiittarfianni naalakkersuinikkut suliaqartut taasisarnermut atortulersuutaat qarasaasiakkoortoq nutarterneqalerpoq, siullertullu umeruarsuaq Inatsisartut ataatsimiittarfianni taasinermi atorneqartartoq ukiullu aqqaneq marluk pallillugit pisoqaassuseqalersimasoq taarserneqarpoq. 

 

Sulisut assartuussinermik nassiussalerinermillu kiffartuussivimmi Usisaammeersut palitsit (Europaller) atorlugit isumannaatsumik ikorfersoriarlutik Inatsisartut ataatsimiittarfianni umeruarsuarmik 250 kilonik oqimaassusilimmik peersisuupput. Umeruarsuaq Inatsisartullu ataatsimiittarfiat innarliivigiumanagit pequttanik nutserisartut umeruarsuaq inersuup saniani aneerasaartarfeeraq aqqutigalugu annippaat. Umeruarsuaq pequttanik nutserisartunit arfineq marlunnit ujatsiussualersuullugu Inatsisartoqarfiup avatangiisini oqaluttuarisaanermi pingaarutilinni pequttanik akimasuunik innarliinani aneerasaartarfeeqqamut assartorneqarpoq.  

 

Umeruarsuaq 100 tomminik angissusilik isumannaatsumik aneerasaartarfimmut pissunneqarmat kranbiilit atorlugit biiliinut assartuussutinut aqqusinermiittunut aqqarneqarpoq. Umeruarsuaq Inatsisartunit akiligassiinertaqanngitsumik Nuummi timersortarfimmut Inussivimmut siunissami atorneqarfissaminut tunissutigineqarpoq.   

 

Umeruarsuaq nutaaq pisoqqamit tomminik tallimanik mikineruvoq, taamaattorli umeruarsuit pitsaassutsikkut 2008-p kingorna ima ineriartorsimatigaat allaat umeruarsuarmik pitsaanerungaartumik akikinnerungaartumillu pissarsisoqarluni.  

 

Umeruarsuaq erseqqarinnerusumik assiliartaqarnermi saniatigut Inatsisartut ataatsimiittarfianni atortulersuutinik allanik attavilerneqarfigisaminik “oqaloqateqarsinnaavoq”. Pisoqaq taamaaliorsinnaajunnaarsimagami.

 

2008-mi nutaarsiassarujussuaq

 

Umeruarsuaq taasisarnermullu atortulersuutit taamani nutaarluinnaat 2008-mi ima nutaarsiassaasimatigaat allaat umeruarsuaq taamani Inatsisartut ukiumoortumik nalunaarutaata saqqaanut assiliartaliunneqarsimalluni. Taasisarnermut atortulersuut qarasaasiakkoortoq piffissamik sipaarutaasimaqaaq Inatsisartunilu ulluinnarni sulinermi iluaqusiisimaqaluni.  

 

Umeruarsuup sapaatip akunnerini arlalinnguani atuutilereernermini tusaamasanngorneranut pissutaavoq, taamani taasititsinermi Inatsisartunut ilaasortat marluk parteeqatigisap najuutinngitsup inaanut ikaarlutik taasisimallutik paasisaasimanerat. Taamani aamma ilaasortaq ilaasortaqatimi angerlarsimalluni najuutinngitsup inaanit taasisimavoq – taamaalillunilu marloriarluni taasilluni. Tamanna soorunami paasineqarsimavoq. Suliap taamani qassiiliuutigineqarnerujussuata nassatarisimavaa kikkut qanoq taasinerat Inatsisartut ataatsimiittarfianni umeruarsuakkut takuneqarsinnaanngortinneqarnera. Tamatuma saniatigut suleriaaseq allanngortinneqarpoq, taamaalillutik ilaasortat aningaasarsiaqaataanngitsumik Inatsisartut ataatsimiinneranni ullut 14-it pallillugit peqataanissamut Siulittaasoqarfimmit mattunneqarsinnaalerlutik. Taamanimiit ukiuni aqqaneq marlunngulersuni ilaasortamik mattussinissaq Siulittaasoqarfimmit pisariaqartinneqanngisaannarsimavoq.  

 

Inatsisartut ataatsimiittarfianni umeruarsuaq nutaaq Inatsisartut ataatsimiittarfianni atortulersuutinut naleqqussarneqassaaq poorskillu ingerlanerani ikkussorneqassalluni. Aaqqissuussinerup nutaap, missingersuutit ajornartitsinnginnerat naapertorlugu pissarsiariartuaarneqartussap, ilaatigut Inatsisartut ataatsimiinneranni atortussanik ilanngussanillu toqqorterinerit isummaminnik ingerlalersinnerisigut suleriaatsit ilaannik pisariillisaanikkut nukissanik sipaarutaanissaa siunertaavoq.