2024 2023 2022 Flere år...
22-04-2020
2020-mi upernaakkut ataatsimiinnissaq
Upernaakkut ataatsimiinnissaq kinguartinneqarsimasoq qanittukkut ingerlanniarneqassasoq Siulittaasoqarfimmit ulloq 21 april aalajangiunneqarpoq.
Upernaakkut ataatsimiinnissap kinguartinneqarnissaanik Siulittaasoqarfiup aalajangiussinera COVID19-ip ineriartorneranik tunngaveqartinneqarsimavoq, maannakkullu ineriartorneq Inatsisartut immaqa pisarnermit sivikinnerusuugaluamik ataatsimiissinnaanerannik ajornarunnaartitsisutut isikkoqarpoq.
Inatsisartut ukiumut minnerpaamik marloriarlutik nalinginnaasumik ataatsimiittartussaasut Inatsisartut suleriaasianni allassimavoq. Inatsisartulliuku piffissaq tamakkerlugu katersuuteqqasanngikkaluarlutik ukioq kaajallallugu sulisartut. Naalakkersuisunik nakkutilliinissaq Inatsisartut suliassaraat. Pissutsit sakkortuut inuiaqatigiinnut atugaritinneqarsimasut - sulilu atugaritinneqartut eqqarsaatigalugit – Inatsisartut Naalakkersuisunik nakkutilliillutik suliassaminnik isumaginninniarlutik ataatsimiinnissartik pisussaaffigaat. Ajornartorsiornerup ingerlaavartumik iliuuseqarfigineqarsimanerata, maannakkumiit qanoq ingerlariaqqinnissap siunissamilu assingusumik pisoqassagaluarpat qanoq iliuuseqarumaanissap isiginiarnissaat inatsisartoqarnikkut pisariaqartinneqarpoq.
Taamaalilluni upernaakkut ataatsimiinnissamik pilersaarusiorneq aallarnisarneqarpoq. Angalasinnaaneq inuillu inimi ataatsimi ataatsikkut katersuussinnaasut suli killilersuiffigineqarmata, piareersaateqarnermi tamakku aamma ilanngullugit isumaliutigineqartariaqarput.
Inatsisartut ataatsimiinnerat sapaatip akunnerinik pingasunik sivisussuseqartussatut aallaavittut Siulittaasoqarfimmit naatsorsuutigineqarpoq aallaavittullu taamaallaat immikkoortut UPA20-mi aappassaaniigassanngorlugit pingajussaaniigassanngorlugillu UKA19-imi kinguartinneqarsimasut, suleriaatsimi piumasaqaataasut naapertorlugit ataatsimiititalianik pilersinneqartussanik pilersitsineq kiisalu Naalagaaffiit Peqatigiit ataatsimeersuarnerannut aallartitassanik toqqaanissaq suliarineqassasut. Aammattaaq apeqquteqaat aallaavigalugu oqallittoqartarnissaa naatsorsuutigisariaqassaaq. Siunnersuutit Naalakkersuisunit UPA20-mut tunniussivissami nassiunneqarsimasut tamarmik Naalakkersuisunit tunuartinneqarput, taamaammat Naalakkersuisunit oqaluuserisassanik nutaanik immikkoortoqassanngilaq.
Inatsisartut ataatsimiinnissaata aallartinnissaanut ulluliussassamik qanittukkut nalunaaruteqartoqassaaq, COVID19-imut tunngatillugu malittarisassat eqqarsaatigalugit Inatsisartut katersortinniarlugit unammillernartuusussat qulaajaavigeriarlugit tamanna pissaaq.
Inussiarnersumik inuulluaqqusillunga
Vivian Motzfeldt