Nutaarsiassat

30-04-2020

Inatsisartut 2020-mi upernaakkut ataatsimiinnissaat ulloq 15. maj

Inatsisartut ataatsimiinnissaat ulloq 15. maj aallartissasoq aammalu ullunik ataatsimiiffiusunik arfineq pingasunik sivisussuseqarluni ulloq 29. maajip tungaanut ingerlassasoq Siulittaasoqarfiup ulloq 29. april aalajangiuppaa. Ataatsimiinnerit nal. 11.00 aallartittassapput aammalu kingusinnerpaamik nal. 17.00-ip tungaanut ingerlasassallutik.

Oqaluuserisassat pisarnertut Inatsisartut nittartagaanni takuneqarsinnaassapput tassanilu ingerlaavartumik nutarterneqartassallutik. Oqaluuserisassat nittartakkami takuneqarsinnaalissapput ulloq 30 april.

COVID19 pillugu killilersuutit atuuttut Inatsisartunit suli malinneqassapput, taamaattumillu tusarnaariat, atorfilittat tusagassiortulluunniit Inatsisartut ataatsimiittarfiannut suli isersinnaassanngillat, taakkuli internet, radio aammalu tv atorlugu ataatsimiinnermik malinnaanissaat innersuussutigineqarpoq.

Tusagassiortut Inatsisartut tusagassiortunut inigititaannik atuisinnaassapput, tamatumanili inimi tassani inuit ataatsikkut isersimasinnaasut killiligaassapput.

Taamatuttaaq akunneq apeqquteqarfik ulloq 20. maj ingerlanneqassasoq aammalu partiit siuttuisa apeqqarissaarnerat ulloq 27. maj ingerlanneqassasoq tamarmillu nal. 10.00 aallartissasut Siulittaasoqarfimmit aalajangiunneqarpoq.

Upernaakkut ataatsimiinnissap aaqqissugaanissaa:

• ak. 20-mi ulloq ataatsimiiffik ataasiussaaq, tassalu ulloq 15. maj, nal. 11.00
• ak. 21-mi ullut ataatsimiiffiit pingasuussapput (marlunngorneq, pingasunngorneq tallimanngornerlu)
• ak. 21-mi akunneq apeqquteqarfik nal. 10.00-imit 11.00-imut ingerlanneqassaaq, tamatumalu kingorna ataatsimiinneq nalinginnaasoq nanginneqassalluni
• ak. 22-mi ullut ataatsimiiffiit sisamaassapput (ataasinngorneq, marlunngorneq, pingasunngorneq tallimanngornerlu) nal. 11.00
• ak. 22-mi partiit siuttuisa apeqqarissaarnerat nal. 10.00-imit 13.00-imut ingerlanneqassaaq, tamatumalu kingorna ataatsimiinneq nalinginnaasoq nanginneqassalluni

Oqaluuserisassat allannguuteqarsinnaapput, taakkulu Inatsisartut nittartagaanni ingerlaavartumik tamanut saqqummiunneqartassapput.

Inatsisartut ataatsimiittarfianniinnermi malittarisassat aammalu ataatsimiinnerup ingerlanneqarnerani killissarititaasut

Inatsisartut ataatsimiinnerat COVID19 pillugu killilersuutit atuunneranni pitsaanerpaamik ingerlanneqarsinnaaqqullugu ataatsimiittarfimmi eqqaanilu najuunnermut malittarisassat uku malinneqarnissaat pisariaqarpoq:

• Ataatsimiittarfik piareersarneqassaaq aatsaallu ataatsimiinnissaq minutsinik 15-inik sioqqullugu ilaasortanit iserfigineqarsinnaanissaminut ammarneqassalluni

• Amerlanerpaamik ilaasortat 31 + ataatsimiinnermi aqutsisumut allatsi ataaseq + nakkutilliisoq ataaseq ataatsikkut ataatsimiittarfimmiissinnaassapput

• Inissaminnukarnerminni aniartornerminnilu ilaasortat aqqut naannerpaaq toqqassagaat kaammattuutigineqarpoq

• Avataaneersut, tusagassiortut atorfilittallu ataatsimiittarfimmut isersinnaanerat periarfissaassanngilaq. Internet tv-lu aqqutigalugit ataatsimiittarfimmi ataatsimiinnermik malinnaanissaq innersuussutigineqarpoq. Tusagassiortulli Inatsisartut tusagassiortunut inigititaannik killilimmik atuisinnaassapput.

UPA20-mi atortussat pisarneq malillugu Inatsisartut nittartagaanni uani pissarsiarineqarsinnaassapput: www.ina.gl

Inussiarnersumik inuulluaqqusillunga

Vivian Motzfeldt

Inatsisartut Siulittaasuat