Nutaarsiassat


2020 2019 2018 Flere år...

06-05-2020

Avannaata Kommuniani qassusersorluni aalisarneq pillugu suleqatigiinnissamut aaqqiissutissanullu kaammattuuteqarneq

Avannaata Kommuniani qassusersorluni qaleralinniarnerup ulloq 30. april 2020 unitsinneqartup sivitsorneqarnissaanik kissaateqarluni saaffiginnissummik Aalisarnermut, Piniarnermut Nunalerinermullu Ataatsimiititaliaq tigusaqarpoq. Suliaq pillugu ataatsimiititaliaq ulloq 5. maj 2020 Aalisarnermut, Piniarnermut Nunalerinermullu Naalakkersuisumik siunersiuivoq.

 

Kommunip suliassai tassani pineqartut ataatsimiititaliamit ilisimaneqarpoq, aammalu ataatsimiititaliaq Naalakkersuisulluunniit Avannaata Kommunianut suliamut tassunga tunngatillugu iliuuseqaqqusisinnaanngitsoq.


Ataatsimiititaliamiliuna naliliisoqartoq, suliassaqarfimmi tassani kommunip ileqqoreqqusaasa aalisartunit piniartuniillu amerlasuunit ajornartorsiutitut nalilerneqartut qanimut misissorneqarnissai pisariaqartoq.  Suliaq suli ingerlavoq pingaaruteqarlunilu, tassami suliassaqarfimmi pineqartumi qaleralittassat tamarmik pisarineqarsimanngitsut ataatsimiititaliaq paasitinneqarnikuuvoq.

 

Taamaammat inuiaqatigiinnut aammalu sumiiffimmi aalisartunut piniartunullu iluaqutaasussanik aaqqiissutissanik piaarnerpaamik nassaarniarluni Naalakkersuisut, Avannaata Kommunia KNAPK-lu ataatsimoorussamik suleqatigiissitamik pilersitsissasut Aalisarnermut, Piniarnermut Nunalerinermullu Ataatsimiititaliamit sakkortuumik kaammattuutigineqarpoq.  

 

Henrik Fleischer

 

Aalisarnermut, Piniarnermut Nunalerinermullu Ataatsimiititaliami Siulittaasoq

Paasisaqarnerorusukkaanni ataatsimiititaliap siulittaasua saaffigineqarsinnaavoq oqarasuaat +299 52 72 82

 

Ataatsimiititaliamut ilaasortat:

Siulittaasoq Henrik Fleischer, siulittaasup tullia Aqqaluaq B. Egede, Jens Danielsen, Erik Jensen, Hans Enoksen, Muté B. Egede aamma Steen Lynge.