2024 2023 2022 Flere år...
27-05-2020
Akunnerup apeqquteqarfiup taamaatinneqarnera pillugu Naalakkersuisut tusagassiorfinnut nalunaarutaannut Inatsisartut Siulittaasuata akissutaa.
Inatsisartoqarnikkut ileqqussat pitsaasut malillugit inatsisartoqarnermut tunngasumik toqqaannartumik oqaaseqarnermi akissuteqartoqarnissaanut periarfissiisoqartarpoq.
Akunnerup apeqquteqarfiup ulloq 20. maajimi ingerlanneqartussap taamaatinneqarnera pillugu Naalakkersuisut ulloq 22. maaji tusagassiorfinnut nalunaarutaat innersuussutigalugu makku paasissutissiissutigineqassapput.
Inatsisartut ataatsimiittarfianni ataatsimiinnermi oqaluuserisassanik kisiartaalluni aalajangersaasartoq tassaavoq Siulittaasoqarfik.
Suleriaatsimi § 37, imm. 7-imi allassimavoq (suleriaatsimi 1. juuni 2016-imeersumi imm. 5-imi malittarisassap 1. juuli 2020-p tungaanut atuuttup assinga):
”Inatsisartut ataatsimiinnerisa piareersaasiorneqarnerannut atatillugu Inatsisartut Siulittaasoqarfiat sapaatip akunneranut ataasiarluni nalunaaquttap akunneranik ataatsimik sivisussusilimmik apeqquteqartarfissamik aalajangersaasinnaavoq, Inatsisartunut ilaasortat malaatiinnarlugu nalunaarutigeqqaarnagulu Naalakkersuisunut ingerlaannartumik akisassamik apeqquteqarfigisinnaasaannik. Naalakkersuisut nalunaarpata apeqqut akissuteqarfigisinnaanagu suliarinera taamaalilluni naammassineqassaaq. Sapaatip akunnikkaartumik akunnermi apeqquteqarfiusartumi aalajangiisoqarsinnaanngilaq.”
Taamatut pilersaarusiornermini Siulittaasoqarfiup aalajangiuppaa upernaakkut ataatsimiinnermi sivikitsumi akunneq apeqquteqarfik ataaseq ingerlanneqassasoq, tamatumanilu Naalakkersuisut siulittaasuat ilimasaarneqarpoq qinnuigineqarlunilu akinneq apeqquteqarfik taanna ingerlateqqullugu. Taamaalillunilu COVID19-ip piffissami sivisuumi atuunnerani Inatsisartut ataatsimiittarfianni ataatsimiittoqarsimannginnerata kingorna ilaasortanit apeqqutinut Naalakkersuisut siulittaasuata akissuteqarsinnaanissaa siunertarerpiarlugu akunneq apeqquteqarfik immikkoortinneqarpoq.
Akunnerulli apeqquteqarfiup ingerlannissaanik qinnuigineqarnini taanna Naalakkersuisut siulittaasuata akissuteqarfiginngilaa, taamaattumillu akissuteqannginneq Siulittaasoqarfimmit allatut paasineqarani qinnuiginninnermut akuersinertut taamaallaat paasineqarsinnaavoq.
Akunnerulli apeqquteqarfiup ingerlanneqarnissaa ullunik marlunnik sioqqullugu Siulittaasoqarfimmut paasissutissiissutigineqarpoq Naalakkersuisumik allamik akunnermik apeqquteqarfimmik ingerlatsisussamik Naalakkersuisut siulittaasuat nassitsilersaartoq.
Akunnermili apeqquteqarfimmi pilersaarutaasumi Inatsisartunut akissuteqarsinnaanani Naalakkersuisut siulittaasuata uppernarsarmagu akunneq apeqquteqarfik taanna Naalakkersuisut siulittaasuannut immikkut naatsorsuussaasoq Siulittaasoqarfimmit taamaatinneqarpoq.