2024 2023 2022 Flere år...
16-06-2020
Corina-virusip nassatarisaanik ilassutitut aningaasaliissuteqarnissamik qinnuteqaatinik Aningaasaqarnermut Akileraartarnermullu Ataatsimiititaliap suliarinninnera.
Aningaasaqarnermut Akileraartarnermullu Ataatsimiititaliaq maannamut coronavirusip tunillaassuutilernerata nassataanik ilassutitut aningaasaliissutissanut qinnuteqaatinik qulinik tigusaqarlunilu suliaqarsimalerpoq. Naalakkersuisut qinnuteqaataat ilaatigut suliffeqarnermut inuussutissarsiutinillu ingerlatsisunut ikiuutinut, peqqinnissaqarnermi immikkut ittumik iliuuseqarnissamut kiisalu nunatta karsianut akileraarutinik akitsuutinillu akiliutissanik kinguartitsinissamut Naalakkersuisunik piginnaatitsinermut tunngassuteqarput. Ilassutitut aningaasaliissutissanut qinnuteqaatit ilaat Sanaartugassanut Iluarsartugassanullu Aningaasaateqarfimmit aningaasanik utertitsinissamik, utertitallu pineqartut nunami tamarmi sanaartugassanut aningaasaliissutigineqarnissaannik kissaatinut tunngassuteqarput. Aningaasat pineqartut assersuutigalugu Uummannami umiarsualivimmut, inunnik isumaginnittoqarfimmi qarasaasiarsornikkut atortulersuutinut kiisalu illoqarfinni assigiinngitsuni tallimani ilinniartunut inissiassanik sanaartornermut atugassiissutigineqarallarput.
Ataatsimiititaliap isumaa malillugu sanaartornikkut suliassaqartitsiniutitut iliuusissat arlallit pisariaqarluinnartut aallartinneqartussat nunatsinni nunat immikkoortuinik, kommuninik imaluunniit innuttaasunik aalajangersimasunik salliutitsissanngillat. Taamaattumillu suliniutit nunatsinni tamarmi najukkani suliffissaqartitsinermut sammitinneqarnissaat ataatsimiititaliamit kissaatigineqarpoq. Ataatsimiititaliaq isumaqarpoq assersuutigalugu ilinniartut inaannik sanaartorneq, ilinniarfiit aammalu aningaasanik allatigut atugassanngortitsinissaq aamma isiginiarneqassasut. Ataatsimiititaliap aalajangiineri Inatsisartut nittartagaanni www.inatsisartut.gl – imi uani nassaarineqarsinnaapput: ”Aningaasaqarnermut Ataatsimiititaliap aalajangigai”.
Tamatuma saniatigut peqqinnissaqarfimmi ingerlatat tunngaviusumillu atugarissaarneq eqqorneqassanngitsut ataatsimiititaliaq aamma isumaqarpoq. Kommunini ataasiakkaani ingerlatassat eqqarsaatigalugit kommunit pisariaqarnera naapertorlugu akuutinneqassasut ataatsimiititaliaq isumaqarpoq.
Suliffeqarfinnut Inuussutissarsiorfinnullu Ikiorsiissutit piffissami killilimmi atuutissapput, 30. juni 2020 ilanngullugu, aningaasaliissutinilu atorneqanngitsoqassagaluarpat taakkua Nunatta Karsianut utertinneqassallutik.
Piffissap suliniuteqarfiusup naareerneratigut suli pisariaqartitsisoqassagaluarpat, atugassiiso-qartariaqassaaq nutaamik Aningaasaqarnermut Akileraartarnermullu Ataatsimiititaliamut saqqummiussereernikkut.
Inuussutissarsiuummik ingerlatsisut pingaartumillu inuussutissarsiornermik suliassaqarfimmi sakkortunerpaamik eqqorneqartut atuutsitsinermit sivisunerusumik ikiuutinik pisariaqartitsissasut aammalu aaqqissuussinerit nutarterneqarnissaat sivitsorneqarnissaalluunniit Naalakkersuisut maanna sulissutigigaat ataatsimiititaliamit ilisimaneqarpoq. Naalakkersuisut suliaqarnerisa inernissaat Aningaasaqarnermut Akileraartarnermullu Ataatsimiititaliap pissangalluni utaqqivai.
Tassunga atatillugu ataatsimiititaliamit nuannaarutigalugu maluginiarneqarpoq, takornariartitsinermik inuussutissarsiorneq aasaaneranut aggersumut nukittorsarniarlugu Naalakkersuisut ”Takornariartitsinermik inuussutissarsiuteqartunut ingerlatassanut” ikiorsiissutinik nutaanik atuutilersitsisimasut.
Ataatsimiititaliap Naalakkersuisullu qanimut pitsaasumillu oqaloqatigiittarnerannik iluarisimaarinninnini Aningaasaqarnermut Akileraartarnermullu Ataatsimiititaliap oqaatigiumavaa.
Inussiarnersumik inuulluaqqusillunga
Hermann Berthelsen
Aningaasaqarnermut Akileraartarnermullu Ataatsimiititaliami Siulittaasoq
Paasisaqarnerujumalluni Aningaasaqarnermut Akileraartarnermullu Ataatsimiititaliap siulittaasua Hermann Berthelsen, uunga saaffigineqarsinnaavoq: +299 52 75 56. Ataatsimiititaliap siulittaasuata tullia Múte B. Egede, aamma ugguuna saaffigineqarsinnaavoq: +299 55 21 06.