2024 2023 2022 Flere år...
31-08-2020
Naalakkersuisut 2021-mut aningaasanut inatsisissatut siunnersuutaat.
2021-mut aningaasanut inatsisissatut siunnersuut Aningaasaqarnermut Akileraartarnermullu Ataatsimiititaliap misissorpaa.
2021-mut aningaasanut inatsisissatut siunnersuummut Aningaasaqarnermut Akileraartarnermullu Ataatsimiititaliap aallarniutaasumik apeqqutai oqaaseqaataalu matumuuna nassiunneqarput. Apeqqutinut pingaarnertut tunngaviuvoq Aningaasaqarnermut Akileraartarnermullu Ataatsimiititaliap Uummannami 2020-mi aggustimi ulluni sisamani missingersuutit pillugit isumasioqatigiinnermini aningaasanut inatsisissatut siunnersuummik ataatsimoortumik sukumiisumik misissuinera.
Naak misissuinini sukumiilluinnartumik ingerlakkaluarlugu Naalakkersuisut inatsisissatut siunnersuutaata maannatut isikkoqartilluni ataatsimiititaliamit maannangaaq akuersaarneqarsinnaanngitsumik annertussuseqartumik amigartoorfiusussaanerata qitiutinnissaa ataatsimiititaliamit toqqarneqarallarpoq.
Pissutsit maannatut itsillugit ukiup tullianut ukiunullu missingersuusiorfiusunut aningaasanut inatsisissatut siunnersuut tamakkiisumik aningaasalersugaappat akisussaassuseqarnerpaassasoq ataatsimiititaliaq isumaqarpoq.
Ataatsimiititaliap isumaa malillugu tamatumani pisariaqassaaq sipaaruteqarnissamik siunnersuutinik pisariaqartunik saqqummiussinissaq, tamannami aningaasanut inatsisissatut siunnersuummik ataatsimiititaliap suliaqarnerata ingerlaqqinnissaani pisariaqarluinnartutut ataatsimiititaliamit isigineqarmat.
COVID-19-ip kingunerisaanik siumut naatsorsuutigeriinngisanik aningaasartuuteqarnerup aningaasalersorneqarnissaanut atatillugu karsimik misissuinermit misilittakkat takutippaat amigartooruteqarnissamik missingersuuteqarnermut matussutissatut aningaasalersuutissanik pisariaqartunik Naalakkersuisut nassaarsinnaasimasut.
Taamaattumik sipaarutissatut siunnersuutinik tigussaanerusunik, aningaasat ukiuanni 2021-mi kiisalu tamatuma kingorna ukiuni missingersuusiorfiusuni aningaasanut inatsisip oqimaaqatigiinnissaanik imaluunniit sinneqartoorfiunissaanik qulakkeerinnissinnaasunik, Naalakkersuisunit nassinneqarnissani ataatsimiititaliap kissaatigaa.
Naalakkersuisut inatsisissatut siunnersuutaat iluarsisaq ataatsimiititaliamut nassiunneqareerpat ataatsimiititaliap sulinini nangissavaa.
Aningaasanut inatsit pillugu Naalakkersuisunik qanimut suleqateqarnissaq sulinermilu peqataanissaq ataatsimiititaliamit qilanaarineqarlunilu piareersimaffigineqarpoq.
Kiisalu COVID-19-imut tunngatillugu iliuuseqaqqinnissami Naalakkersuisut periusissamik suliaqarnissaat ataatsimiititaliamit piumasaqaatigineqarpoq.
Inussiarnersumik inuulluaqqusillunga
Hermann Berthelsen
Aningaasaqarnermut Akileraartarnermullu Ataatsimiititaliap siulittaasua