Nutaarsiassat


2020 2019 2018 Flere år...

04-09-2020

2020-mi Inatsisartut ukiakkut ataatsimiinnerat aammalu 2021-mi ukiukkut ataatsimiinnerat

2020-imi Inatsisartut ukiakkut ataatsimiinnissaannut (UKA20) aammalu taassuma nangissutaatut 2021-mi februaarimi ukiukkut ataatsimiinnissaannut (UKIU21) oqaluuserisassat ullumi nassiussuunneqarput.


Inatsisartut ukiakkut ataatsimiinnerat tallimanngornermi ulloq 25. september 2020, nal. 11.00 aallartissaaq ullorlu 25. november 2020-imi unikkallariarluni 2021-imi ukiukkut ataatsimiinnermik, 16. februar aallartittumik ullorlu 2. marts naasussamik, nanginneqassalluni.


Inatsisartunut ilaasortanit immikkoortut nutaat katillugit 56-it Naalakkersuisunillu immikkoortut nutaat 32-t UKA20-mi aammalu UKIU21-mi nangillugit suliarineqartussat oqaluuserisassanut ilanngunneqarput.


Taamaalillunilu ullut ataatsimiiffiusartussat ima agguataarneqarput:


2020-mi ukiakkut ataatsimiinneq (UKA20)

 

  • Inatsisartut ataatsimiinnerat aallartissaaq tallimanngornermi ulloq 25. september, nal. 11.00
  • Sapaatip akunneranut ullut ataatsimiiffiusut pingasuussapput – marlunngorneq, pingasunngorneq aamma sisamanngorneq – piffissami nal. 11.00 – 17.00
  • Sapaatilli akunnerani 40-mi ullut ataatsimiiffiit sisamaassapput
  • Ataasinngorneq tallimanngornerlu ataatsimiititaliani ataatsimiiffiussapput
  • Pingasunngornerit tamaasa piffissami nal. 10.00-imiit nal. 11.00-imut naalakkersuisunut akunneq apeqquteqarfiusinnaasoq ingerlanneqartassaaq, tamatumalu kingorna ataatsimiittarfimmi ataatsimiinneq nanginneqartassalluni, akunnerlu apeqquteqarfik siulleq pissaaq 30. september aammalu Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq pisariaqarneralu malillugu nutarterneqartassalluni.
  • Partiit siuttuisa apeqqarissaarnerat pingasunngornermi ulloq 14. oktober, nal. 10.00-12.00 ingerlanneqassaaq, tamatumalu kingorna ataatsimiinneq 17.00-ip tungaanut nanginneqassalluni
  • Ataatsimiititalianik pilersitsineq (immikkoortoq 4) aammalu siunnersuisoqatigiinnik aalajangiisartutullu ataatsimiititalianik pilersitsineq (immikkoortoq 5) pissaaq ulloq 28. september, tamatumalu kingorna ulloq taanna ataatsimiititaliat inissitsitsissapput
  • Ullunik 28-nik ataatsimiiffiulluni UKA20-mi ulloq ataatsimiiffik kingulleq tassaassaaq ulloq 25. november.

 

 

2021-mi ukiukkut ataatsimiinneq (UKIU21)

 

  • 2021-mi ukiukkut ataatsimiinneq tassaassaaq UKA20-mi sulianik inaarsaaffiusoq aallartissallunilu marlunngornermi ulloq 16. februar, nal. 11.00
  • Tamatumani aamma sapaatip akunneranut ullut ataatsimiiffiusut pingasuussapput – marlunngorneq, pingasunngorneq aamma sisamanngorneq – piffissami nal. 11.00 – 17.00
  • Tamatumani aamma ataasinngorneq tallimanngornerlu ataatsimiititaliani ataatsimiiffiussapput
  • Pingasunngornermi ulloq 17. februar, nal. 10.00-imit 12.00-imut partiit siuttuisa apeqqarissaarnerat ingerlanneqassaaq, tamatumalu kingorna inersuarmi ataatsimiinneq nal. 17.00-ip tungaanut nanginneqarluni
  • Pingasunngorneq ulloq 24. februar, nal. 10.00-imit 11.00-imut akunneq apeqquteqarfik ingerlanneqassaaq, tamatumalu kingorna inersuarmi ataatsimiinneq nanginneqassalluni
  • Immikkoortunik nutaanik oqaluuserisassanut ilanngussisoqassanngilaq aammalu UKIU21 tassaavoq UKA20-mi sulianik nangitsineq.
  • Ullunik 7-inik ataatsimiiffiulluni UKIU21-mi ulloq ataatsimiiffik kingulleq tassaassaaq ulloq 2. marts

 

UKA2020-mut aamma UKIU21-mut atatillugu atortussat tamarmik www.inatsisartut.gl–imi takuneqarsinnaapput.


Iluarsiissutit tamarmik nittartakkami ingerlaavartumik iluarsineqartassapput, taamaattorli suli periarfissaqarpoq atortussat tamaasa qarasaasiakkut tigusarusullugit nalunaarnissamut. Tamanna pillugu saaffiginninneq uunga ingerlanneqassaaq: lkri@inatsisartut.gl.

 


Vivian Motzfeldt
Inatsisartut Siulittaasuat