2024 2023 2022 Flere år...
07-10-2020
Inuit innarluutillit tapersersorneqarnissaannut Inatsisartut inatsisaat malitsinneqarnissaanut piareersarluartoqarnissaa Ilaqutariinnermut Peqqissutsimullu Ataatsimiititaliap kaammattuutigaa
Innarluutillit Illersuisuata Qaanaamut angalanerminut atatillugu sulilluarsimanera tamatumalu nalunaarusiarisimaneranut kingornalu ataatsimiititaliamik ataatsimeeqateqarneranut Ilaqutariinnermut Peqqissutsimullu Ataatsimiititaliamit qujassutigineqarpoq.
Inuit innarluutillit tapersersorneqarnissannut Inatsisartut inatsisaat nr. 13, 12. Juni 2019-imeersoq atuutilerpoq 1. Januar 2020-imi, angalanermilu nalunaarusiami uparuarneqarpoq Qaanaami inatsit malitsinneqanngitsoq. Tamatumunnga atatillugu Qaanaami innuttaasut ikiorserneqarnissaat inatsillu naapertorlugu ikiorserneqarnissamik pisinnaatitaanerat ataatsimiititaliamit tamakkiisumik tapersersorneqarpoq. Aaqqissuulluakkamik ataqatigiissumillu suliniutit, tapersersorteqarnissamut neqeroorutinik, najortimik illersuisoqarnissamik, innarluutilinnut politikkeqarnissamik, siunnersuinermik, ilinniagaqarnissamut neqeroorutinik kiisalu najugaqarnissamut neqerooruteqarnissamik inatsit pitsaasunik suliniutinik arlalinnik imaqarpoq. Tassungali ilanngullugu inatsisip pineqartup atuutilernissaanut malinneqarnissaanullu piareersarluartoqarnissaa kaammattuutigalugu. Ataatsimiititaliap aamma kaammattuutigerusuppaa inatsisitigut annertuumik allannguisoqartillugu innuttaasut sukumiisumik allannguutaasunut paasissutissanik tuniorartuarneqarnissaat.
Inatsisip atuutsinneqarnissaanut eqqortumillu malitsinneqarnissaanut Isumaginninnermut, Ilaqutariinnermit Inatsisinillu Atuutsitsinermut Naalakkersuisoq Ilaqutariinnermut Peqqissutsimullu Ataatsimiititaliamit isumaqatigiittumit ilanngullugu kaammattuutigineqarpoq, ilitsersuutinik, najoqqutassiamik, atortussanillu allanik inatsimmut tapertaasussamik aamma atuutilersinneqarnissaanut qulakkeerinnittussamik, taamaalilluni innuttaasut tapersersorneqarnissamut ikiorserneqarnissamullu pisariaqartitsinerat pisinnaatitaaffiilu naapertorlugit ikiorserneqarsinnaaqqullugit.
Malene Vahl Rasmussen
Ilaqutariinnermut Peqqissutsimullu Ataatsimiititaliami siulittaasoq
Paasissutissat annertunerusut ataatsimiititaliap siulittaasua attavigalugu pissarsiarineqarsinnaapput mobil: +299 52 48 22