2024 2023 2022 Flere år...
27-10-2020
Inatsisartut ukiumoortumik nalunaarutaat 2019
Ukiumoortumik nalunaarut 2019 Inatsisartut ukiumoortumik nalunaarutaat 16-it sinneri peqatigalugit maanna qarasaasiakkut pissarsiarineqarsinnaanngorpoq, tassani qaammatisiutit ukiuata ingerlanerani
Inatsisartut sulinerat pillugu paasissutissat assigiinngitsorpassuit
takuneqarsinnaallutik. Inatsisartulli ukioq suliffigisaat septemberimit septemberimut ingerlasarpoq.
2003-mi ukiumoortumik nalunaarummi siulittaasup aallarniutaani ima
allassimavoq:
”2003-mut Inatsisartut nalunaarusiaat una taamaattut siullersaraat. Matuma kingorna Landskarsip Naatsorsuutai naammassineqareeraangata ukiut tamaasa Inatsisartut ukiup siuliani suliarisimasaannik nassuiaatinik imalimmik nalunaarusiortoqartalissaaq.
Ukiumut qaangiuttumut nalunaarusiamik saqqummiisarnissamik suliniuteqarneq inatsisiliortutut sulinerup aammalu Inatsisartut Naalakkersuisullu naalakkersuinikkut suleqatigiinnerisa ammasumik paasinartumillu saqqummiunneqartarnissaannik Inatsisartut
kissaateqarnerannik tunngaveqarpoq.”
Taamaalillunilu 2019-imi ukiumoortumik nalunaarut taamatut ataavartumik
ingerlataqarnermut ilaavoq.
Ukiumoortumik nalunaarut 2019 uani aajuk aamma killilimmik amerlassusilerlugit naqiterneqarluni.
Kalaallit Nunaanni Namminersornerulernerup eqqunneqarneranit ukiunik 40-
nik aammalu Namminersornerup eqqunneqarneranit ukiunik 10-nik 2019
nalliuttorsiorfiuvoq. Nalliuttorsiorfiit taakku marluk pillugit paasissutissat
kingumut qiviarfigaavut, soorluttaaq eqqumiitsuliornermik suliniummit
“Meeqqat inatsisiliuutaannik” taagorneqartumit meeqqat inatsisissatut
siunnersuusiaannit tigulaakkat atornissaannut akuerineqarsimasugut.
Ukiumoortumik nalunaarut 2019 Inatsisartut sulinerat pillugu paasissutissanik atorluarneqarsinnaasunik assigiinngitsorpassuarnik imaqarpoq. Taamaalilluni siulittaasoqarfimmi, ataatsimiititaliani aallartitanilu suliat pillugit paasissutissanik imaqarpoq.
Aammattaaq ilaasortat sulinngiffeqarallarnerat sinniisussanillu atuineq aammalu Inatsisartunut ilaasortaatitat agguataarneqarnerat pillugit paasissutissanik imaqarpoq.
Soorluttaaq Nersornaammik tunniussinerit Inatsisartunullu aningaasaliissutit
atorneqarnerat pillugit paasissutissat atorluarneqarsinnaasut aamma imarigai.
Neriuppunga ukiumoortumik nalunaarut Inatsisartut sulinerat pillugu
paasissutissiilluassasoq aammalu Inatsisartut sulinerata ammasumik
ingerlanneqarnissaanik anguniagaqarnermut tapertaassasoq.
Inussiarnersumik inuulluaqqusillunga
Vivian Motzfeldt
Inatsisartut Siulittaasuat