2024 2023 2022 Flere år...
30-10-2020
Pituffimmi kiffartuussinissamut neqeroortitsinissamut piumasaqaatit pitsanngoriartut
Naalakkersuisut USA-llu akornanni isumaqatigiissut pillugu Nunanut Allanut Sillimaniarnermullu Ataatsimiititaliap naammagisimaarinninnini oqaatigaa. Minnerunngitsumik Pituffimmi kiffartuussinissamut neqeroortitsinissamut piumasaqaatit pitsanngoriartut pillugit.
Naalakkersuisut isumaqatiginninniarneranni Nunanut Allanut Nukissiuuteqarnermullu Naalakkersuisoq ataatsimiititaliamik annertuumik peqataatitsisimanera pillugu ataatsimiititaliap qutsavigaa. Arlalitsigut ataasiaannaratik ataatsimiititaliap ilaasortai ilanngussaqarnissaminnut periarfissinneqararsimapput. Isumaqatiginninniarnernut taakkununngalu naatsorsuutigisat pillugit Ataatsimiititaliallu ataavartumik ilisimatinneqartarnissaa Naalakkersuisup isumagisarsimavaa.
Neqeroortitsinissamut piumasaqaatit nutaat siusinnerusukkut piumasaqaataasimasunut sanilliullugit pitsanngoriarsimasut Ataatsimiititaliap paasilluarpaa. Isumaqatigiissut atsiorneqartoq taamaasilluni kalaallit nunaanni innuttaasunut tamanut iluaqutaasussanngorpoq.
USA-mik illugiilluni suleqatiginninnissaq ataatsimiititaliap qilanaaraa. Minnerunngitsumik kiffartuussinissamut neqeroortitsinissap tulliup suliarineqarnissaa eqqarsaatigalugu.
Aleqa Hammond
Nunanut allanut Sillimaniarnermullu Ataatsimiititaliap Siulittaasua
Annertunerusumik paasisaqarniaraanni ataatsimiititaliap siulittaasua attavigineqarsinnaavoq mobil +299 49 23 09 sianerfigalugu