2024 2023 2022 Flere år...
02-11-2020
Kalaallit Nunaanni kulturikkut kingornussat annaajartulerpavut
Kukkusumik toqqorsiveqarneq, oquk uumasullu ajoqutaasut pissutigalugit, eriagisassat taartissaqanngitsut nalitoqisullu Kalaalit Nunaata oqaluttuassartaanik oqaluttuassallit, Kalaallit Nunaanni kulturikkut kingornussat annaaneqariartorput. Kalaallit Nunaata Katersugaasivianiuttut toqqorsivianiittullu katersugaasivimmiittussat 56.000-t annertunerusumik pitsaanerusumillu inissaqartinnissaat qulakkeerneqartariaqarpoq. Kalaallit Nunaanni kulturikkut kingornussat katersugaasivimmiittussat piujuaannartussat qularnaatsumik inissinneqarsinnaapput nutaamik toqqorsivittaarnikkut.
Eriagisassat ulorianartorsiortut
Eriagisassat taartissaqanngitsut katersugaasivimmiittussat nalilerneqarsinnaanngitsut illutoqqani toqqorsivittut naleqqutinngitsuni maannakkut inissinneqarsimapput. Oqummik uumasunillu ajoqutaasunit ulorianartorsiortinneqarlutik, eriagisassat taartissaqanngitsut oqaluttuarisaanermilu pingaaruteqarluinnartut katersugaasiviup illuutaani toqqorsivinni immamut qanittuaqqamiittuni mallinillu qaararneqartuni aseroriaannaallutik inissinneqarsimapput.
Kalaallit Nunaanni kulturikkut kingornussanut inissalik toqqorsivik nutaaq
Kalaallit Nunaanni kulturikkut kingornussat aserorneqassanngippata toqqorsiviit nutaarluinnaat pisariaqartippavut. Oqummit uumasunillu ajoqutaasunit saassunneqaqqunagit kukkusumillu silaannaap isugutaanit aserorneqaqqunagit kulturikkut kingornussassarsiavut eriagisassat taartissaqanngitsut toqqorsivinnut naleqqulluinnartunut inissittariaqarpavut, ataatsimiititaliaq ataatsimut oqaaseqarpoq.
Pineqartut politikkikkut pingaartinneqannginneri pissutigalugu Kalaallit Nunaanni kulturikkut kingornussat naleqqutinngilluinnartuni inissinneqarsimanerat ataatsimiititaliamit ajuusaarnarluinnartutut isigineqarpoq. Inissiivissat nutaat qulakkeerniarlugit aningaasaliissutinik pingaarnersiuinikkut nassaartoqartariaqartoq, siunissami ilinniarnikkut, ilisimatusarnikkut iluatinnartut ataannarnissaat qulakkeerniarlugu, ataatsimiititaliaq isumaqarpoq.
Kulturikkut takornariaqartitsineq periarfissaavoq
Kulturikkut takornariaqartitsinikkut nunat oqaluttuarisaanerinut soqutiginninneq pilersinniarlugu ineriartortitsinermillu pilersitsiniarluni nunarpassuarni allani kulturi atorluarneqartarpoq. Tamannalu aamma pinngitsoorani Kalaallit Nunaanni pisinnaasariaqarpoq.
Kulturerput immikkuullarilluinnarpoq, oqaluttuassaanermi immikkuullarilluinnartumik oqaluttuassartaqarluni. Taamaammat annertunerusumik aningaasarsiorfissatut kulturerput isigisariaqarparput, taamaasiornikkut siunissami ukiorpassuarni illersugaalluni ataasinnaaqqullugu, Ataatsimiititaliaq isumaqatigiittoq nassuiaavoq.
Nivi Olsen
Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami Siulittaasoq
Annertunerusumik paasisaqarniaraanni ataatsimiititaliap siulittaasua attavigineqarsinnaavoq mobiili +299 48 22 29 sianerfigalugu