2024 2023 2022 Flere år...
15-11-2020
Partiinut tapiissutinik atuineq
Partiimi ataatsimi partiinut tapiissutini atuineq pillugu suliaq tusagassiorfinnit sammineqartoq pillugu saaffiginnissutinik arlalinnik Siulittaasoqarfik tigusaqarpoq.
Aallarniutigalugu Siulittaasoqarfimmit sakkortunerpaamik erseqqissarneqassaaq naalakkersuinikkut sulinermut aningaasatigut tapiissutigineqartut naalakkersuinermut sulinermut atorneqartarnerat Siulittaasoqarfimmit soorunami naatsorsuutigineqarmat.
Taamaattumillu Siulittaasoqarfimmit aamma naatsorsuutigineqarpoq tapiissutit siunertaat malillugu atorneqarnissaat partiinit tamanit anguniarneqartarlunilu aningaasat atugassiissutigineqartut pissusissaatut atorneqartartut aammalu partiinut tapiissutit naalakkersuinikkut sulinermut atorneqarnerannik innuttaasut akornanni pisariaqanngitsumik qularutiginnilersitsisoqassanngitsoq.
Suliassarli pineqartoq Siulittaasoqarfimmit tusagassiorfiit taamaallaat aqqutigalugit ilisimaneqartoq Siulitaasoqarfimmit oqaaseqarfigineqarsinnaanngilaq.
Siulittaasoqarfimmilli paasissutissiissutigineqarsinnaavoq partiit naatsorsuutaat kukkunersiukkat kiisalu tapiissutit naalakkersuinikkut sulinermut atorneqarsimanerannut uppernarsaat Siulittaasoqarfimmit ukiumoortumik tiguneqartarmata.
Taamaalillutillu partiinut aningaasatigut tapiissuteqartarnermik aaqqissuussineq tassaavoq kattuffinnut namminersortunut partiinut tapiissuteqarneq.
Tapiissutit naalakkersuinikkut sulinermut aningaasatigut tapiissuteqartarneq pillugu Inatsisartut inatsisaanni (ulluinnarni partiinut tapiissutinut inatsimmik taaneqartartumi) maleruagassiuunneqarput.
Inatsimmi aalajangersakkamut nassuiaatini allassimavoq “naalakkersuinikkut suliniarneq” tamanut tunngatittariaqartoq tapiissutillu atorneqarsinnaasut naalakkersuinikkut suliniarnermut tunngassuteqarpiarsorineqartunut.
Sorluttaaq allassimasoq qanoq iliornikkut aningaasat naalakkersuinikkut sulinermi pitsaanerpaamik atorneqarsinnaanersut tapiissutinik tigusisartut (tassa partiit ataasiakkaat) namminneq nalilertussaagaat.
Tapiissutit siunnertaasa ataanniittutut assersuutaasinnaasutut taaneqarsinnaapput akissarsianut aningaasartuutit aammalu partiit sulisuinut ajunngitsorsiassat allat, sullississutinik pisineq, allaffiit ilusilersorneri allaffissornerlu, ataatsimiinnernut atatillugu nerisaqartitsineq, ilassinninnermut aningaasartuutit, angalanermut aningaasartuutit, IT-mut atortut, oqarasuaatinut internetimullu aningaasartuutit, aviisinik atuagassianillu pisartagaqarneq, ussassaarutit qineqqusaarnermilu atortut. Taakkuli assersuutaannaapput.
Parti sinnerlugu aningaasartuutigineqartut pillugit partiit ataasiakkaat maleruagassiorsimanissaat aningaasatigulluunniit killiliisimanissaat naatsorsuutigisariaqarpoq. Taamaalillunilu maleruagassat killiliussallu taamaattut malitsinneqarnissaat partiit namminneq aamma aalajangigassarissavaat.
Inatsisartunili sulinermi maleruagassat inatsisillu atuuttut iluarsaanneqarnerannik suliaqarnermik Siulittaasoqarfik februar 2019-mili aallartitsivoq – tamatumani partiinut tapiissuteqartarnermik inatsit ilanngullugu.
Aningaasat partiimut sapinngisamik annertunerpaamik iluaqutaasumik atorneqarnissaannik partiit ataasiakkaat namminneq soqutiginninnerisigut – taamatullu partiit aningaasanik atuinerat pillugu inuiaqatigiit qassiiliornissaasa pinaveersaartinneqarnissaata partiinit soqutigineqarneratigut – atornerluinerup pinaveersaartinneqarnissaanik ullumikkut aaqqissuussineq atugarput tunngaveqartinneqarpoq.
Taamaalillunilu suliaq ilungersunartutut isigalugu Siulittaasoqarfimmit malinnaavigineqarpoq, sulialli partiimi pineqartumi suliarineqarnera naammassineqarsimasorinanngimmat aammalu partiimi namminermi pissutsinut tunngammat suliaq pineqartoq erseqqinnerusumik iserfigineqarsinnaanngilaq.
Inussiarnersumik inuulluaqqusillunga
Vivian Motzfeldt
Inatsisartut Siulittaasuat