2024 2023 2022 Flere år...
10-12-2020
Inatsisartut Nunat Avannarliit Siunnersuisoqatigiiffianni peqataanerat
Nunat Avannarliit Siunnersuisoqatigiiffiata ukioq manna ataatsimoorluni katersuunnera sap. ak. 44-mi qarasaasiakkut attaveqaatitigut ingerlanneqarpoq.
Inatsisartut Nunat Avannarliit Siunnersuisoqatigiiffiannut ilaasortaatitaat marluk, Doris Jakobsen Jensen (S) aamma Sofia Geisler (IA), tamarmik nunatta aallartitaatut Nuummiit peqataapput.
Ataatsimoorluni katersuunnermi aallartitat ataatsimiinnernut arlalinnut, ilaatigullu COVID-19-ip tunillaassuunnera pillugu ataatsimoorluni ataatsimiinnermut peqataapput. Tassani nunani avannarlerni naalakkersuisut siulittaasui Naalagaaffiit Peqatigiit allattaanerannik António Guterresimik ataatsimeeqateqarlutik.
Pingaartumik Nunat Avannarliit Siunnersuisoqatigiiffiannit tusarniaanermut akissuteqaatikkut EU-p Issittumut politikkianut sunniuteqarsimaneq aallartitanit tulluusimaarutigineqarpoq. Tassani ilinniartitaanermut, silaannaap allanngoriartornerata nassatarisaanik nunap inoqqaavisa inuuniarnikkut atugaannut, plastikinik mingutsitsinermut aammalu drivhusgasimik aniatitsinerup annikillisarnissaanut tunngatillugu EU-p pingaarutilittut inissisimanerata attanneqarnissaanik EU kaammattorneqarpoq.
Peqatigitillugu avatangiisit uumasoqatigiiaallu assigiinngitsut amerlassusaat eqqarsaatigalugit issittumi innarliasumi pisuussutsinik piujuaannartitsinermut issittumi pimoorussilluni siunniussat aalajangiisuunerat erseqqissaatigineqarpoq.
Allartitat marluullutik Avatangiisinut Ataatsimiititaliamut kiisalu Nunani Avannarlerni Piujuaannartitsinermut Ataatsimiititaliamut ilaasortaapput. Avatangiisit pillugit suliniuteqartumut nersornaammik tunniussineq najuuffigalugu assut nuannerpoq, tassani ukioq manna avatangiisit pillugit suliniuteqartumut nersornaammik kalaallit marluk silap pissusaa pillugu suliniuteqartut tunniussisuullutik.
Kalaallit Nunaanni inuusuttut silap pissusaa pillugu oqallinnernut kiisalu avatangiisit pillugit suliniuteqarnernut akuleruteqqullugit aallartitanit kaammattorneqarput. Inuusuttut siunissaat pillugu aqutsivugut, silaannaap pissusaa kiisalu avatangiisit pillugit oqallinnermi inuusuttut nipaasa tusaaneqarnissaat akuutinneqarnissaallu pisariaqartipparput.
Siunissami Nunani Avannarlerni Suleqatigiinnermut Naalakkersuisumik pitsaasumik isumassarsiaqarfiulluartumillu suleqateqarnissaq aallartitanit qilanaarineqarpoq.
Sofia Geisler, (IA) Aallartitat Siulittaasut Doris Jakobsen Jensen, (S)
Nunat Avannarliit Siunnersuisoqatigiiffiannut ilaasortat Paasisaqarumalluni
Sofia Geisler oqarasuaatikkut ugguuna +299 58 81 55, kiisalu
Doris Jakobsen Jensen oqarasuaatikkut ugguuna +299 53 94 00 saaffigineqarsinnaapput