Nutaarsiassat


2021 2020 2019 Flere år...

22-01-2021

Inuussutissarsiutigalugu aalisarnermi pisassiissutinik akuersissutinillu aqutsiviginninneq pillugu ingerlatsinikkut annertusisamik kukkunersiuineq

Nunatta Karsiata naatsorsuutaanik il.il. kukkunersiuinermut atatillugu ingerlatsinerit pillugit ingerlaavarnerusumik annertusisamik misissuisoqartarnissaa Kukkunersiuinermut Ataatsimiititaliamit kissaatigineqarpoq.

 

 

Misissuinermi matumani suliassaqarfiit arlallit Kukkunersiuinermut Ataatsimiititaliamit erseqqinnerusumik qulaajaavigineqarumasut akornanni siulleq pineqarpoq. Misissuinerit naammassineqarneri ilutigalugit tamanut saqqummiunneqarnissaat ataatsimiititaliamit anguniarneqarpoq. Nalunaarusialli Covid-19-ip nassatarisaanik kinguaattuungaatsiaqqapput. Taamaalilluni nalunaarusiap immikkoortua siulleq august 2020-mi naammassineqarpoq ullorlu 16.9.2020-mi ataatsimiititaliamut tunniunneqarluni immikkoortuatalu aappaa ulloq 29.10.2020-mi ataatsimiititaliamut tunniunneqarluni.

 

Nalunaarusiat ingerlaqqiffissiami uani nassaarineqarsinnaapput; link

 

Nalunaarusiat imarisaat

Nalunaarusiap immikkoortuani siullermi Aalisarnermut, Piniarnermut Nunalerinermullu Naalakkersuisoqarfimmi aalisakkanik pisassiissutinik akuersissutinillu aqutsiviginninnermi ingerlatseriaatsit sisamat qulaajaavigineqarput. Ingerlatseriaatsinut ataasiakkaanut tunngatillugu Naalakkersuisoqarfiup aqutsiviginninneranik nalilersuisoqartarpoq aqutsiviginninnerullu nukittorsarneqarnissaanut siunnersuuteqartoqarluni.

 

Nalunaarusiap immikkoortuata aappaa avataasiorluni sinerissamullu qanittumi aalisarnermi akuersissutinik qinnuteqaatinik qiniataakkanik misissuiffiginninnermik imaqarpoq. Naalakkersuisoqarfiup qinnuteqaatinik suliarinnittarnera kukkunersiuinermi piumasaqaataasut arlallit tunngavigalugit nalilersuiffigineqarpoq.

 

Nalunaarusiap immikkoortui taakku marluk nalunaarutiginninnertut ataatsitut isigineqassapput. Nalunaarusiat kiisalu taakku pillugit Naalakkersuisoqarfimmit oqaaseqaatit Nunatta Karsiata Kukkunersiuisuanit ataatsimiititaliamut tunniuinneqarput.

 

Tamatuma kingorna Kukkunersiuinermut ataatsimiititaliaq Aalisarnermut, Piniarnermut Nunalerinermullu Naalakkersuisumut itisiliiviusumik apeqquteqarpoq. Naalakkersuisup akissutai misissuinermut immikkut ilanngussatut ilanngunneqarsimapput.

 

Ataatsimiititaliamit tupaallannartutut sakkortuumillu isornartorsiugassatut isigineqarpoq Aalisarnermut, Piniarnermut Nunalerinermullu Naalakkersuisoqarfimmi:

  • Aalisarnermut inatsisit naapertorlugit aalajangersakkat arlallit malinneqarsimanngimmata tassunga ilaallutik nalunaarutit tunngavilersuutai.
  • Itigartitsissutigineqartut allallu allakkatigut tunngavilersorneqartussaatitaanerat pillugu pisortat suliaminnik ingerlatseriaasiat pillugu inatsit malinneqarsimanngimmat

 

Misissuinermi misissugassatut tigusat akuersissutinut 2019-imi atuuttunut imaluunnit kingusinnerusumut ukioq 2020-mut akuersissutinut qinnuteqaatinik suliarinninnermut tunngassuteqarput.  

 

Ataatsimiititaliap misissuineq pillugu naliliinera ataani takuneqarsinnaavoq.

 

 

Ataatsimiititaliaq sinnerlugu

 

 

Erik Jensen

 

Kukkunersiuinermut Ataatsimiititaliami Siulittaasoq

Paasisaqarnerujumalluni ataatsimiititaliap siulittaasua oqarasuaammut ugguuna attavigineqarsinnaavoq; (+299) 53 04 08

 

 

Ilannqussaq: (link)

 

Kukkunersiuinermut Ataatsimiititaliap oqaaseqaatai:

Pissutsit malittuani taaneqartut ataatsimiititaliamit sakkortunerpaamik isorineqarput

  • Nalunaarusiami issuagaq siulleq: ”Suliani misissukkani arlalinni avataasiorluni aamma sinerissap qanittuani aalisarnermut tunngasut pillugit naliliisoqarpoq, qanoq ingerlatsisoqarnissaanik (ingerlatsinermi tunngavissaq) aalajangiisimanerup aamma sullissinerpiamik ingerlatsinerup akornanni assigiinngissuteqartoq. Assersuutigalugu naalakkersuisoqarfimmit tamatigorluinnaq nakkutilliiffigineqarneq ajorpoq, qinnuteqartut (taakkununnga ilanngullugit ingerlatseqatigiiffiit)

akileraartussaatitaanermut- aamma najugaqartussaatitaanermut piumasaqaatinik naammassinninnerat, aalisarnermi inatsimmi § 6 naapertorlugu.”

 

  • Ingerlatseqatigiiffinnit quliusunit taamaallaat arfinillit angerlarsimaffeqarnermut kiisalu uuttuutit pillugit uppernarsaatinik nassitsisimanerannut Aalisarnermut, Piniarnermut Nunalerinermullu Naalakkersuisoqarfiup qisuariaateqarsimannginnera. Nalunaarusiami issuakkat aappaat: “Isumaqarpoq, naalakkersuisoqarfiup tunngaviatigut nakkutilliiffigisinnaanngikkaa ingerlatseqatigiiffiit uuttuinermut allakkianik inuiaassusermullu uppernarsaatinik nassiussisimanngitsut, ilumut angallatinik suli piginnittuunersut, angallatit Kalaallit Nunaanni angerlarsimaffeqarnersut aamma angallatit takissutsimut piginnaassutsimullu piumasaqaatinik naammassinnissinnaanersut.”

 

  • Sinerissamut qanittumi aalisarsinnaanermut akuersissutinik qinnuteqartut qinnuteqaataasa akornanni misiligutitut tigusani sisamani allaffissornikkut kukkunerit amigaatillu arlallit paasineqarmata.

 

Deloitte ataani allassimaneratut allappoq. Nalunaarusiamit issuakkat pingajuat:

 

”Ilitsersuutit piusut tamakkiisumik allaaserinninnermik imaqanngillat, sullissisut suliamik ingerlatsinerminni qanoq qinnuteqaatinik suliaqassanersut aamma qinnuteqartut malittarisassanik piusunik naammassinninnerannut qanoq naliliisassanerannut tunngasunik.

 

Naalakkersuisoqarfimmi sullissinermik ingerlatsinermi allattuinermik annikitsumik ingerlatsineq, sullissisut ataasiakkaat malittarisassanik aamma sullissinermik ingerlatsinissamut namminneq paasinnittaatsiminnik atuinissaannut annermik periarfissiuussivoq. Tamassuma nassataanik sullissinermut atasumik assigiinngitsunik aalajangiisoqarsinnaaneranut periarfissaqarpoq.”

 

Siuliani allassimasut ataatsimiititaliamit isornartinneqarput.

 

Deloittep misissuinera ilaatigut ’Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaannik nr. 8, 8. april 2016-imeersumik’ tunngaveqarpoq. Misissuinerup naammassinerata kingornatigut ‘Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaat nr. 47, 18. december 2020-meersoq’ nutaaq atuutsinneqalerpoq.

 

Nalunaarusiami issuakkat sisamaat: ”Taamaattoq naalakkersuisoqarfik periarfissaqarsimanngilaq itigartitsinermut [pissutaasoq] pillugu allakkatigut uppernarsaammik nassiussinissaminut, sulianut allattuinernik sullissinermulluunniit tunngasumik allattuinermik uppernarsaasiortoqarsimanngimmat. Taamaaliornikkut naalakkersuisoqarfik uppernarsaammik allakkamik saqqummiussisinnaanngilaq ingerlatseqatigiiffiup qinnuteqaataata itigartinneqarneranut tunngavilersuummik imaqartumik”.

 

Pisortat ingerlatsineranni sulianik suliarinnittarnermut inatsit malillugu allakkatigut qinnuteqaammik allakkatigut itigartitsinerup tunngavilersorneqartussaanera piumasaqaataavoq.

Qulaani allassimasut ataatsimiititaliamit assorsuaq isornartutut isumaqarfigineqarput

 

Nalunaarusiami issuakkat tallimaat:

”Naalakkersuisoqarfimmi maannamut periuserineqartoq tassaavoq, allakatigut akissummik naatsumik nassiussisoqartarluni, tassani qinnuteqartoq ilisimatinneqartarpoq pineqartoq akuersissummik imaluunniit itigartitsissummik tunineqarsimanersoq akuersissutinut nalunaarummi § 13 naapertorlugu (Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaat nr. 8 af 8. April 2016-imeersoq).

 

Tamanna isumaqarpoq, qinnuteqartut akuersissummik imaluunniit itigartitsissummik tunineqarpat pissutaasoq ilisimatitsissutigineqarneq ajortoq. Qinnuteqartut qinnuteqaataat itigartitsissutigineqarsimasut nalusarpaat itigartitsineq piginnaassutsimut killiussamik ataatsimik arlalinnilluunniit naammassinninnginnertik pissutigalugu itigartinneqarnerlutik. Itigartitsinermut pissutaasup ersarissuunnginnerata kinguneranik qinnuteqartut itigartinneqarsimasut piffissami kingusinnerusumi akuersissummik qinnuteqarnissaminnut pitsaanngitsumik aallaaveqartinneqalersarput.”

 

Pisortat ingerlatsineranni sulianik suliarinnittarnermut inatsit malillugu allakkatigut qinnuteqaammik allakkatigut itigartitsinerup tunngavilersorneqartussaanera piumasaqaataavoq.

Qulaani allassimasut ataatsimiititaliamit assorsuaq isornartutut isumaqarfigineqarput.

 

Naalakkersuisoqarfimmit allakkiami 16.10.2020-meersumi ima allassimasoqarnera; “tunngavilersukkamik akissuteqartarneq atuutilersimasoq” ataatsimiititaliamit naammagisimaarlugu maluginiarneqarpoq.

 

Aalisarnermut, Piniarnermut nunalerinermullu Naalakkersuisoqarfimmit allakkiami 16.10. 2020-meersumi Naalakkersuisoqarfik oqaaseqaamminik kiisalu ingerlatsineq pillugu annertusisamik kukkunersiuinermit kaammattuutinik atuutilersitsinissamut piffissaliilluni saqqummiussivoq.

Deloittemit kaammattuutit ilaat siumut aqqutissiuussinissamik pitsanngorsaatitullu siunnersuuteqarnissamik siunertaqarput.

Taamaalilluni ingerlatsineq pillugu misissuineq kiisalu siumut isigisumik pitsanngorsaatinik siunnersuuteqarnissaq matumani pineqarpoq.

 

Ataatsimiititaliap suliarinninnermini inuttarai:            .

Inatsisartunut ilaasortaq Erik Jensen, Siulittaasoq                              .

Inatsisartunut ilaasortaq Aqqaluaq B. Egede, Siulittaasup tullia        .

Inatsisartunut ilaasortaq Malene Vahl Rasmussen

Inatsisartunut ilaasortaq Pele Broberg    

Inatsisartunut ilaasortaq Aleqa Hammond

 

 

Ataatsimiititaliaq sinnerlugu

 

 

 

Erik Jensen

Kukkunersiuinermut Ataatsimiititaliami Siulittaasoq.