2024 2023 2022 Flere år...
11-06-2021
Nunanut Allanut Sillimaniarnermullu Ataatsimiititaliap peqataatinneqarnerunissani piumasaraa
Aprilimi qinersinerup kingorna maannamut Naalakkersuisut tusagassiorfitsigut sammineqarneranni nunanut allanut sillimaniarnermullu politikki inituvoq. USA-p nunanut allanut ministeriata Antony Blinkenip oqaluttuarisaanermut inissittumik nunatsinnut tikeraarnera, Kunngeqarfiup Issittumut Periusissiassaata suliarineqarnera kiisalu Issittumi piginnaasaqalernissamut isumaqatigiissut tusagassiorfitsigut annertuumik sammineqarput.
Inatsisartut Nunanut Allanut Sillimaniarnermullu Ataatsimiititaliaata peqataatinneqarnissaa pisariaqarpoq, tassuunakkut iliuuserisat naalakkersuinikkut tunuliaqutserneqarnerat aammalu nunanut allanut tunngatillugu nunatsinniit naalakkersuinikkut ingerlatsinerup patajaassusia qularnaarneqassammata.
Qanimut peqataatinneqarneq ataatsimiititaliap kissaatigaa tamannalu piffissami aggersumi sulissutigissallugu. Ilaatigut USA-p nunanut allanut ministeriata nunatsinnut tikeraarneranut atatillugu ilisimatinneqarnissaq siunertaralugu Nunanut Allanut Naalakkersuisoq Pele Broberg (N) ataatsimiititaliamit naapeqateqarpoq, piffissamilu aggersumi siunersiorneqassalluni Issittumi piginnaasaqalernissamut isumaqatigiissut pillugu kingullertigut oqaatigineqartut itisilernissaat siunertaralugu.
Sofia Geisler:
”Qulakkeerneqartariaqarpoq paasissutissanik tamakkiisunik Ataatsimiititaliamut apuussisoqartarnissaa, taamaasilluta aalajangiinerit pingaarutillit tusagassiorfitsigut atuarneqartarnissaat pinngitsoorumallugu, aammalu qinikkatut inissisimasugut tungitsinnut pitsaasumik attaveqarneq akuutitsinerlu aqqutigalugit ingerlatsisoqarnissaa siunertaralugu. Tamatuma siunissami qulakkeernissaa naammassissallutigu suliarinissaa qilanaaraarput.
Sofia Geisler
Nunanut Allanut Sillimaniarnermullu Ataatsimiititaliap siulittaasua
Paasissutissat sukumiinerusut ataatsimiititaliap siulittaasuata +299 58 81 55 attaveqarfigalugu pissarsiarineqarsinnaapput