2024 2023 2022 Flere år...
27-08-2021
2021-mi ukiakkut ataatsimiinneq
2021-imi Inatsisartut ukiakkut ataatsimiinnissaannut (UKA21) oqaluuserisassat ullumi nassiussuunneqarput.
Inatsisartut ukiakkut ataatsimiinnerat tallimanngornermi ulloq 24. september 2021, nal. 11.00 aallartissaaq 30. november 2021-illu tungaanut ingerlasussatut pilersaarutigineqarluni.
Siulittaasoqarfiulli ullut ataatsimiiffiusussat kingullit ulloq 10. september apeqquteqaat aallaavigalugu oqallinnissamik siunnersuutinik tunniussivissap kingorna naleqqussarumaarpai, taamaattumillu ullut ataatsimiiffiusussat kingulliit kingusinnerusukkut iluarsineqarsinnaassallutik.
Inatsisartunut ilaasortanit immikkoortut nutaat katillugit 53-it Naalakkersuisunillu immikkoortut nutaat 42-t UKA21-mi suliarineqartussatut oqaluuserisassanut ilanngunneqarput.
2021-mi ukiakkut ataatsimiinneq (UKA21)
- 2021-mi ukiakkut ataatsimiinneq aallartissaaq tallimanngornermi ulloq 24. september, nal. 11.00
- Sapaatip akunneranut ullut ataatsimiiffiusut pingasuussapput – marlunngorneq, pingasunngorneq aamma sisamanngorneq – piffissami nal. 11.00 – 17.00
- Sapaatilli akunnerani 40-mi ullut ataatsimiiffiit sisamaassapput
- Ataasinngorneq tallimanngornerlu ataatsimiititaliani ataatsimiiffiussapput
- Pingasunngornerit tamaasa piffissami nal. 10.00-imiit nal. 11.00-imut naalakkersuisunut akunneq apeqquteqarfiusinnaasoq ingerlanneqartassaaq, tamatumalu kingorna ataatsimiittarfimmi ataatsimiinneq nanginneqartassalluni, akunnerlu apeqquteqarfik siulleq pissaaq ulloq 29. september aammalu Naalakkersuisut apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassaaq pisariaqarneralu malillugu nutarterneqartassalluni.
- Partiit siuttuisa akunnerminni apeqqarissaarnerat ataatsimiinnerup qiteqqunnerani pingasunngornermi ingerlanneqassaaq, tamatumalu kingorna ataatsimiinneq 17.00-ip tungaanut nanginneqassalluni. Partiit siuttuisa akunnerminni apeqqarissaarnerata qaqugu pinissaa oqaluuserissat naleqqussarneqareerpata nalunaarutigineqassaaq.
- Ataatsimiititalianik pilersitsineq (immikkoortoq 4) aammalu siunnersuisoqatigiinnik aalajangiisartutullu ataatsimiititalianik pilersitsineq (immikkoortoq 5) pissaaq ulloq 27. september, tamatumalu kingorna ulloq taanna ataatsimiititaliat inissitsitsissapput
- Ullunik 29-nik ataatsimiiffiulluni UKA21-mi ulloq ataatsimiiffik kingulliugallartoq tassaassaaq ulloq 30. november.
UKA2021-mut atatillugu atortussat tamarmik www.inatsisartut.gl-imi takuneqarsinnaapput.
Ataatsimiinnissaq sapaatip akunneranik ataatsimik sioqqullugu iluarsiissuteqarnissamik siulittaasoqarfimmut qinnuteqarnissamut periarfissaqarpoq, taamaattumillu oqaluuserisassani allanngortitsisoqartarsinnaalluni. Iluarsiissutit tamarmik nittartakkami ingerlaavartumik iluarsineqartassapput, taamaattorli suli periarfissaqarpoq atortussat tamaasa qarasaasiakkut tigusarusullugit nalunaarnissamut. Tamanna pillugu saaffiginninneq uunga ingerlanneqassaaq: lkri@inatsisartut.gl.
Kristian Jeremiassen
Inatsisartut Siulittaasuata tullia siulleq