Nutaarsiassat


2021 2020 2019 Flere år...

15-09-2021

Illersornissaqarfimmi ilinniarnissamut misilitsittarnerit tamatumunngalu tunngasut aningaasartuutit matussuserneqarnissaat

Illersornissaqarfimmi ilinniarnissamut misilitsinnissamut inuusuttut periarfissaat pillugit paatsuunganeq annertoq aasap ingerlanerani pivoq. Eqqartorneqarput Illersornissaqarfimmi ilinniartunngornissamut misilitsinnerit, sakkutuujusussaatitaanermut tunngatillugu misilitsinnerit kiisalu aningaasartuutaasut ilinniartuunersiuteqartitsinermut inatsit naapertorlugu matussuserneqarnissaannut inuusuttut periarfissaat.  Sammisamut tunngasut eqqartorneqarput inuusuttut akornanni, nutaarsiassaqartitsivinni allaatigisani apersuinernilu kiisalu paragraf 37 naapertorlugu Naalakkersuisunut apeqqutigineqartarlutik.

 

Tamatuma peqatigisaanik Inatsisartut Nunanut Allanut Sillimaniarnermullu Ataatsimiititaliaata Nunanut Allanut, Inuussutissarsiornermut, Niuernermut Silallu pissusaanut Naalakkersuisumik oqaloqatiginninnini ingerlappaa. Oqaloqatigiinnerni taakkunani Ilinniartitaanermut, Kultureqarnermut, Timersornermut Ilageeqanermullu Naalakkersuisoq aamma akuutinneqarpoq.

 

Suliaq pillugu Ataatsimiititaliap Naalakkersuisullu taaneqartut marluk akornanni paaseqatigiinneq ersarinnerulersorinarpoq. Taamaattoq suliami uani pingaarnerpaatut inissisimasut - tassalu inuusuttut - eqqarsaatigalugit ersarissaanissaq amigaataavoq.

 

Tamanna tunngavigalugu Ataatsimiititaliap Naalakkersuisut pineqartut marluk kaammattorpai tamanit atuarneqarsinnaasumik inuusuttunut nassuiaasseqqullugit Illersornissaqarfimmi ilinniarnissaminnut periarfissaat suunersut, inuusuttut taakku ilinniartuunersiuteqarnermut inatsimmi periarfissaat suunersut, tamatumunngalu ilanngullugu sakkutuujusussaatitaanermut atatillugu misilitsinneq qanoq kalluarneqarnersoq - Naalakkersuisut tungaanniit inuusuttunut tamanna tunniunneqartariaqartoq Ataatsimiititaliaq isumaqarmat.

 

 

Nunanut Allanut Sillimaniarnermullu Ataatsimiititaliaq sinnerlugu

Inussiarnersumik inuulluaqqusillunga

 

 

Sofia Geisler

Siulittaasoq

Paasissutissat annertunerusut ataatsimiititaliap siulittaasua mobil +299 58 81 55 aqqutigalugu pissarsiarineqarsinnaapput