Nutaarsiassat

01-11-2021

Saqqami nakorsiartarfiup matuneqarneranut Ilaqutariinnermut Peqqissutsimullu Ataatsimiititaliap qisuariaataa

Nunaqarfimmi Saqqami nunap immikkoortuani Avannaani inissisimasumi nakorsiartarfiup matuneqarneranut Ilaqutariinnermut Peqqissutsimullu Ataatsimiititaliap tusagassiorfinnut nalunaaruteqarnermigut oqaaseqarfigiumavaa. Matusineq KNR-p nittartagaatigut ulloq 22. Oktober 2021-imi saqqummiunneqartumi nutaarsiassaq ilungersunartorujussuartut ataatsimiititaliamit isumaqarfigineqarpoq.

Matusinermi sulisussaaleqineq tunngavilersuutigineqartoq ataatsimiititaliamit maluginiarneqarpoq.  Tamanna innuttaasunut sapaatip akunneranut marlussoriarluni nunaqarfimmi innuttaasunut nakorsaatinik annertussusiliiartortussamik tunniussiartortussamillu peqqinnissakkut sullissisumik nunaqarfimmiit sanilerisamiit tikittoqartalerneranik kinguneqarpoq. Tamatuma saniatigut pisariaqartitsineq naapertorlugu nunaqarfimmi innuttaasut Ilulissat napparsimmavianut sianertarnissaminnut periarfissaqarput.

Matusineq nunaqarfimmi innuttaasunut annertuumik sunniuteqartoq ataatsimiititaliaq naliliivoq, naalakkersuinikkullu  pingaartumik Naalakkersuisumit susassaqarfimmut akisussaasumit isummerfigineqartariaqarluni. Innuttaasut peqqinnissakkut sullinneqarnissaminnut nunaqarfinnisuulli allani najugaqartut assigalugit naligiimmik innuttaasut pisinnaatitaaffeqarput. Tamatuma saniatigut innuttaasunut matusinermi eqqugaasunut siunissami minnerpaamik peqqinnissakkut sullississutinik minnerunngitsumillu sullissinerup ajornerulinnginnissaa pillugu sulisoqarniarnersoq paasissutissiissutigineqarnissaa ataatsimiititaliamut pingaaruteqarpoq.

Taamaattumik nunaqarfimmi Saqqami siunissami sullissinissaq pillugu ersarissaasoqarnissaa qulakkeerumallugu allakkatigut arlalinnik ataatsimiititaliaq ullummi apeqquteqaasiorpoq. Apeqquteqaatit taakku UANI atuarneqarsinnaapput.

Agathe Fontain

Ilaqutariinnermut Peqqissutsimullu Ataatsimiititaliap

siulittaasua

Annertunerusumik paasisaqarusuttut siulittaasoq mobil +299 48 45 31 aqqutigalugu attavigineqarsinnaavoq

[1] Saqqaq peqqinnissamik sullissisumik amigaateqarmat peqqinnissaqarfik matusariaqartoq | KNR