2024 2023 2022 Flere år...
09-11-2021
AG-mi sap. ak. 42-mi saqqummersumi allaaserisamut akissut – Siulittaasoqarfik soorunami Inatsisartunut ilaasortat saqqummiussaqarsinnaatitaanerannik killilersuinngilaq
Siulittaasoqarfik sapaatip akunnerani 42-mi AG-mi allaaserisaq tunngavigalugu siulittaasoqarfik Inatsisartunut ilaasortat saqqummiussaqarsinnaatitaanerannik killilersuinerarlugu tunngavissaqannginngitsumik oqaaserineqartunut akissummik aviisimut nassiussaqarpoq.
Siulittaasoqarfik Inatsisartunut ilaasortanik tallimanik ilaasortaqarpoq Inatsisartuni partiinit sisamaneersunit, tassa Inuit Ataqatigiinnit, Siumumit, Naleqqamit Atassummillu.
Siulittaasoqarfik taamaalilluni naalakkersuisoqatigiit sinnerlugit sulinngilaq, kisiannili Inatsisartunit tamarmiusunit immikkut qinigaalluni Inatsisartut tamarmiusut sinnerlugit sulisussatut, soorlu aamma siulittaasoqarfiup partiilersorani Inatsisartullu tamaasa sullisissallugit suliassamisut ataqqinarnerpaatut toqqarsimagaa. Tamanna inatsisitigut aalajangersagaanngilaq qinigaaffiilli arlalinngortut ingerlanerini ikkulluni suleriaasinngorsimalluni. Tamanna pissutigiinnarluguluunniit eqqumiissaaq siulittaasoqarfik arlaatigut ilaasortat saqqummiussaqarsinnaatitaanerannik killilersuisimassagaluarpat.
Siulittaasoqarfiup taamaalilluni allaaserisami suliamik saqqummiussineq ilisarisinnaanngilaa. Allaaserisamut akissut tamarmiusoq tusagassiorfinnut nalunaarummut matumunnga ilanngussami atuarneqarsinnaavoq.
Inussiarnersumik inuulluaqqusillunga
Hans Enoksen
Inatsisartut Siulittaasuat