Nutaarsiassat

22-03-2022

Meeqqat amerluutaat, meeqqat kigutaannut narlorsaatit aammalu meeqqanut nakorsaqarniarneq pillugit siunersiuineq

Ulloq 21. marts Peqqinnissamut Naalakkersuisoq siunersiuinissamut Peqqissutsimut Ataatsimiititaliamit aggersarneqarpoq. Tamatumunnga atatillugu makku ataatsimiititaliamit qulaajarneqarput:

• Meeqqanut amerluutilinnut tunngatillugu neqeroorutinut suliap aamma sumiiffinni ataasiukkaani nunalu tamakkerlugu neqeroorutinut tunngasunut siunissami pilersaarutit, pingaartumillu danskit napparsimmaviinik suleqateqarnissamut periarfissat killiffii

• Meeqqat kigutaasa narlorsarneqartarnerannut suliap killiffia

• Meeqqanut uninngasunut atugassarititaasut, matumani ilanngullugit sulisunik amigaateqarneq aamma meeqqat pitsaasumik akisussaassuseqartumik isumassorneqarnissaallu qulakkeerneqarsimajuarnissaa qanoq sulissutigineqarnersoq, matumani ilanngullugu siunissami meeqqanut immikkut ilisimasalinnik pisariaqartitsinerup qanittoq ungasinnerusorlu isigalugit sulissutigineqarnissaat qanoq qulakkeerniarneqarnersoq.

Peqqinnissaqarfiup iluani ineriartorneq pillugu malinnaanissaq ataatsimiititaliamik pingaartinneqarluinnarpoq aammalu ataatsimiititaliap suliai pillugit innuttaasut paasitinneqartarnissaat  Ilaqutariinnermut Peqqissutsimullu Ataatsimiititaliamit pingaaruteqartutut isumaqarfigineqarput.

Agathe Fontain

Ilaqutariinnermut Peqqissutsimullu Ataatsimiititaliap siulittaasua

Annertunerusumik paasisaqarusuttut ataatsimiititaliap siulittaasua mobil +299 48 45 31-imut attaveqarsinnaapput