2024 2023 2022 Flere år...
08-04-2022
Ulloq 5. april KNR-imi allaaserisamut naqqiut
Apriilip ulluisa tallimaanni KNR-ip nittartakkamini allaaserisaq ima qulequtalik ilannguppaa: ”KNR-ip toqqaannartumik aallakaatitsinerata ajutoornera Inatsisartuni attaviup ikkulluarneqannginneranik pissuteqartoq.”
KNR-imi allaaserisaq ingerlaqqippoq (issuaaneq): ” … Inatsisartuni teknikkikkut ajornartorsiuteqarpoq.” nangillunilu: ”Ajutooqqanera ima ajortigaaq allaat ataatsimiittarfimmit kalaallisut aallakaatitsineq aallaqqaataani nipeqarani.” […] ” Tamanna Inatsisartut maanna siulittaasorisimasaata Hans Enoksenip qisuariaateqarfigaa.
- KNR-ip atortorissaarutaani ajutoorneruvoq, taanna oqarpoq.
Tamannali sallunerusoq, KNR-ip pisortaa, Karl-Henrik Simonsen oqarpoq.
- Inatsisartunuku namminneq atortorissaarutaanni ajutoortoqartoq.”
Inatsisartut Siulittaasuat (maanna siulittaasorisimasaat) sallunerassallugu pissusissamisuunngitsutut isigaara, naatsorsuutigisariaqarparalu issuarneqarninnit sakkukinnerusumik oqaaseqarsimassasutit.
Tamannali apeqqutaatinnagu siulimma Inatsisartut ataatsimiittarfianni oqaaserisai eqqarsaatigalugit taakku ilumoorneri aalajangiusimasariaqarpakka.
Inatsisartut Siulittaasuat Inatsisartut ataatsimiinneranni ilaasortanit attaveqarfigineqaruni paasitinneqarlunilu KNR-ip aallakaatitsinera nipeqanngitsoq, taava siulittaasup iliornermisut suliaq pillugu ilaasortat nalunaarfigisariaqarpai aallakaatitsiniarnikkut ajornartorsiutit nalunnginnamigit, ajornartorsiutillu Inatsisartuni sulisunit iluarsineqarsinnaasut pineqanngimmata.
Inatsisartut nittartagaatigut Inatsisartut namminneq ataatsimiinnitik toqqaannartumik aallakaatittarpaat tamatumalu ajunngitsumik ingerlanissaa taamaallaat akisussaaffigalugu.
Akerlianik Inatsisartut ataatsimiinnerinit KNR-ip toqqaannartumik aallakaatitsisarnerinut teknikikkut atortut ajunnginnersut Inatsisartut akisussaaffiginngilaat, taamatullu aamma atortut taakku ajoquteqarpata iluarsineqarnissaannut akisussaanani (periarfissaqaraniluunniit).
Inatsisartulli soorunami Inatsisartut ataatsimiittarfiannit KNR-ip toqqaannartumik aallakaatitsisinnaanissaa soqutigisaraat, taamaattumillu Inatsisartut initaanni teknikikkut atortut pisariaqartut ikkussuunnissaannut uninngatinnissaannullu KNR periarfississimallugu, soorlu aamma inimut KNR-ip teknikikkut atortuisa inissisimaffigisaannut KNR-ip isersinnaatitaanissaanut Inatsisartut soorunami ikiuussinnaasut.
Paasitinneqarpunga KNR-imi sulisut ilaat Inatsisartut ataatsiminnissaat aqaguttoq teknikikkut atortunik misissuisimasoq. Tamanna aamma allaaserisami atuarneqarsinnaavoq, soorlu aamma atuarneqarsinnaasoq ajornartorsiutaasoq innaallagiamut ikkuttartup ikkulluaqqannginneranik pissuteqartoq.
Kukkuneq tamanna Inatsisartut akisussaaffiginngilaat. Atortut KNR-ip nammineq atortorivai, taamalu aamma KNR-ip atortut ikkussorlugillu nakkutigisassaralugit.
Kissaatiginarsimagaluarpoq suliap allaaserisami saqqummiunneqarnermisut illuinnaasiortumik paatsiveerussaataasumillu (pissusiviusullu eqqarsaatigalugit kukkusumik) saqqummiunneqannginnerani KNR tusagassiortorlu pineqartoq suliaq pillugu Inatsisartunut saaffiginnissuteqarsimanissaat.
Taamaattumik KNR-ip pisortaa qinnuigisariaqarpara piaarnerpaamik KNR-ip nittartagaani naqqiuteqaqqullugu paasissutissiissutigalugulu KNR-ip nammineq atortui ajoquteqarsimasut nipeqannginneranullu pissutaasimasut.
Inussiarnersumik inuulluaqqusillunga
Kim Kielsen