2024 2023 2022 Flere år...
02-06-2022
Aviisip nittartagaani ulloq 20. maj 2022 allaaserisamut qulequtalimmut: ”Inatsisartuni ilaasortat arlallit ataatsimeeqataasanngitsut”, aviisimut Sermitsiaq.ag-mut qisuariaat.
Allaaserisaq qanittukkut Sermitsiaq.ag-p nittartagaani ilanngunneqartoq isumaqalersitsisinnaavoq piffissami matumani Inatsisartuni najuutinnginnerit akuttunngitsumillu taasisarnerit pillugit isumaqatigiissuteqartarnerit innuttaasut qinikkat aqqutigalugit oqartussaaqataanerat eqqarsaatigalugu ajornartorsiutaasoq. Tamanna oqaaseqarfigineqartariaqarpoq – taasisarnerillu pillugit isumaqatigiissuteqartarnermik aaqqissuussineq sorpiaanersoq nassuiarneqartariaqarluni:
Inatsisartunut ilaasortat najuutinngikkallarsinnaanerat sulinngiffeqarsinnaatitaanerallu Inatsisartut Suleriaasiatigut malittarisassaqartinneqarpoq, najuutinngikkallarsinnaaneq eqqarsaatigalugu killiliussat sukangallutik. Inatsisartunut ilaasortatut atuuffik inuiaqatigiinnit toqqagaanikkut suliassiissutitut pisussaaffiuvoq, taamalu atuuffiulluni qinikkap isumagissallugu pisussaaffigisaa.
Ilaasortarli allatuulli napparsimanermik eqqorneqarsinnaavoq. Piffissami sivisunerusumi napparsimanermi (tassa napparsimanissaq sapaatit akunnerinit marlunnit sivisunerussasutut naatsorsuutigineqaraangat) sinniisussamik ataatsimiigiaqqusisoqartarpoq, taamatulli pisoqartillugu angalaniarnikkut allatigulluunniit aporfiit pissutigalugit piffissami sivikitsumi partiip Inatsisartuni tamakkiisumik sinniisuutitaqannginneranik tamanna isumaqarsinnaalluni.
Tassalu taamatut pisoqartillugu taasisarnerit pillugit isumaqatigiissuteqartarnermik aaqqissuussineq atorneqartarpoq. Taasisarnerit pillugit isumaqatigiissuteqarnikkut napparsimanerit najuutinnginnerillu allat Inatsisartut ataatsimiittarfianni taasisoqassatillugu pissaanerup oqimaaqatigiinneranut sunniuteqannginnissaat qularnaarneqartarpoq. Illuatungiliuttut ilaasortaatitaat taasinermi peqataasinnaanngippat isumaqatigiissuteqarnikkut naalakkersuisuutitaqartunut ilaasortaq taaseqataasassannginnerminik isumaqatigiissuteqartarpoq, soorlu aamma tamatuma akerlianik pisoqartartoq.
Aaqqissuussinermut Inatsisartut ataatsimiittarfianni taasisarnerit kisimik pineqarput. Ataatsimiititaliani taasisarnerit taamaattoq ilaatinneqanngillat, taamaattumillu aaqqissuussineq ataatsimiititaliat sulinerannut sunniuteqartarani.
Aaqqissuussineq taamatuttaaq Inatsisartut ataatsimiittarfianni oqallinnernut ilaasortat peqataasinnaanerannut apeqqutaanngilaq, tassami ilaasortaq taasisarnerit pillugit isumaqatigiissuteqarsimasoq ilaasortap taasisarnerit pillugit isumaqatigiissuteqarsimanngitsup assinganik oqaaseqarsinnaatitaammat.
Naggasiullugu erseqqissarneqassaaq taasisarnerit pillugit isumaqatigiissuteqartarnermik aaqqissuussineq nammineq piumassutsimik tunngaveqarmat partiinullu tamanut iluaqutissatut eqqarsaatigineqarluni.
Inussiarnersumik inuulluaqqusillunga
Kim Kielsen
Inatsisartut Siulittaasuat