2024 2023 2022 Flere år...
16-06-2022
“Aaqqiissutissat pitsaasut sumiiffinni ataasiakkaaniipput”
Ilaqutariinnermut Peqqissutsimullu Ataatsimiititaliaq Aasiannut, Qasigiannguanut, Kangaatsiamut, Niaqornaarsummut aamma Qeqertarsuarmut paasisassarsiorluni angalavoq. Tamatumunnga atitillugu suliffeqarfiit assigiinngitsut, meeqqat, inuusuttut, utoqqaat innarluuteqartullu ulluinnarni atugaat aammalu sulisut sulinerminni atugaat paasisaqarfiginissaat pillugu ataatsimiititaliap pulaarpai. Tamatuma saniatigut utoqqaat peqatigiiffii Oqilaatsukkut aamma Pequikkut ataatsimiititaliap ataatsimeeqatigai.
Inuit amerlasuut akornanni hashi annertuumik ajornartorsiutaasoq sumiiffinnilu innuttaasunut pingaartumik meeqqanut inuusuttunullu pitsaanngitsumik sunniuteqartartoq ataatsimiititaliamit maluginiarneqarpoq. Ataatsimiititaliamit ernumanartinneqarpoq, aammalu sumiiffinni nunalu tamakkerlugu pinaveersaartitsilluni suliniutaasut sakkortusineqarnissaat sammineqarnerulernissaallu kaammattuutigalugu. Peqqinnissakkut siuarsaataasussanik pinaveersaartitsinermillu suliniutit sumiiffinnik aallartisarneqarnissaasa tapersersorneqarnissaat aamma pisariaqartinneqarpoq.
Kommuneqarfik Qeqertalimmi utoqqaat ulluinnarni inuunerat ataatsimiititaliap annertuumik paasisaqarfigaa, eqeersimaartunillu peqatigiiffeqartoq aammalu utoqqalinermi ingerlalluarnissamut peqqinnissakkullu pitsaasumik tunngavissaqartut maluginiarlugu. Utoqqaat illuisa peqqinnissaqarfiillu qanittuiniittut akornanni suleqatigiilluartoqartoq ataatsimiititaliamit aamma maluginiarneqarpoq.
Meeqqanut inuusuttunullu perorsaanikkut tarnillu pissusaanut tunngasunik siunnersuinissamut tunngatillugu pitsaasumik isumalluarnartumillu suliniutinik aallartisartoqartoq ataatsimiititaliamit aamma maluginiarneqarpoq. Meeqqamulli ilaqutaasunullu aaqqiissuteqarniarnermi kinguarsaataasinnaasumik qulaajaanissamut misissortinnissamullu sivisuumik utaqqisoqarsinnaasarnera maluginiarlugu. Tamanna qaangerniarlugu qulaajaanermi periuserineqartartup pitsanngorsarneqarnissaanut aaqqiissutaasinnaasunik isumassarsiortoqarnissaanik suliaqaqqullugit Naalakkersuisut ataatsimiititaliamit kaammattorneqassapput.
Tikeraarnitsinni tikilluaqqusilluarnermut soqutiginninnermullu ataatsimiititaliaq annertuumik qujassuteqarumavoq.
Ilaqutariinnermut Peqqissutsimullu Ataatsimiititaliaq sinnerlugu
Hans Peter Poulsen
Siulittaasoq