Nutaarsiassat

30-06-2022

EQQAANIUT - Uffe Ellemann-Jensenimut eqqaaniut

Nunanut allanut tunngasunut ministeriusimasoq Uffe Ellemann-Jensen ulloq 18. juni 2022 80-inik ukioqarluni toqukkut qimaguppoq.

Uffe Ellemann-Jensen, 1989-imi sølviusumik Nersornaaserneqartoq, cand.polit.-itut ilinniarsimavoq tusagassiortutullu sulinini Berlingske Aftenavisimi aallartissimallugu. 1970-imi TV-Avisimi atorfinippoq, aammalu 1975-imiit 1976-imut Børsenimi aaqqissuisuunerulluni. 1977-imi Folketingimut ilaasortanngorpoq – taamatullu ukiuni 25-ngajanni atuulluni. Ukiuni 1984-imiit 1998-imut partiimut Venstremut siulittaasuuvoq, aammalu 1982-imiit 1993-imut Danmarkip – taamalu aamma naalagaaffeqatigiit – nunanut allanut tunngasunut ministereralugu.

Nunanut allanut ministeritut Kalaallit Nunaata EF-imit anineranut atatillugu atugassarititaasussat isumaqatigiinniutigineqarneri suliassaasa siulliit ilagisimavaat. Tamanna pikkorilluni Kalaallit Nunaatalu soqutigisai ilumoorfigalugit naammassisimavaa, naak nammineq Kalaallit Nunaata maanna EU-nngorsimasumut ilaasortaaginnarnissaa nammineq takorusunnerusimagaluarlugu.

Kingusinnerusukkut Uffe Ellemann-Jensen aamma tassaasimavoq (Pituffimmi sakkutooqarfimmi saassunneqarnermut kalerrisaarutit (radarit) nutarterneqarnissaannik kissaateqarneq tunngavigalugu) taamanikkut naalakkersuisut siulittaasorisaat Jonathan Motzfeldt peqatigalugu nunanut allanut sillimaniarnermullu ataatsimiititaliamik Inatsisartut pilersitsinissaannut kaammattuisuusimasut. Tamatumani siunertaasimavoq nunanut allanut sillimaniarnermullu tunngatillugu pissutsit Kalaallit Nunaannut tunngasut pillugit danskit naalakkersuisunit ilisimatitsissutinik tigusaqartarnissaminnut Kalaallit Nunaanni inatsisartut aamma periarfissinneqarnissaat.

Kalaallit Nunaannut immikkut pissuseqarsimavoq: Kalaallit Nunaanni angalasarnini nuannarisarsimaqai (namminerlu oqarneranut) ”pinngortitaq nuannariinnarnagu, kisiannili aamma inuit tamaani naapittakkakka nuannarisimaqaakka. Pinngortitamummi peqqaarnissinnaasumut taana qanitsigisumik inuuniaraanni immikkuullarissuusariaqarpoq.”

Sunngiffimmini aalisarnermik nuannarisaqartuuvoq. Eqqaamasaminik atuakkiarpassuisa ilaanni asseqarpoq, tassani takuneqarsinnaalluni tuttup amianik parkaqarluni, nannunik qarleqarluni kameqarlunilu, Jonathan Motzfeldt peqatigalugu Qaanaaq avatinnguani eqalukkanik aalisartoq. Aamma sunngiffimmini pinialuttartuuvoq, tamakkulu tamarmik immaqa qularnanngitsumik peqataasimassapput Kalaallit Nunaannik tamaanilu innuttaasunik alutorinninnerujussuanut. Pinngortitamik nuannarinninnerminik piniarnernilu misigisartakkaminik imminut tarrarsorsinnaasarsimavoq. Misigissuseq tamanna tamatsinniippoq ataatsimoorfigalutigalu.

Toqunissani sioqqutilaarlugu apersorneqarnermi ilaanni oqaluttuarpoq 75-inik ukioqalerluni inuuissiornissani sioqqutilaarlugu piniariarsimalluni nalunagu kingullermik piniariarluni, oqaluttuaralugulu tuttorsuaq piniariarnerup naalernerani takkuttoq sanningereerluni. Aallaasimavaa ingerlaannarlu uppisillugu. Tamanna pereermat aallaasini naggammik ittujaarsimavaa – oqarneratut tussunngunermik qujaniarnermillu akullugu.

Uffe Ellemann-Jensenip qimagunnera Kalaallit Nunaanni inuppassuarnut aamma taamatut tussunngunermik qujaniarnermillu malitseqarpoq. Kalaallit Nunaat nunatta ikinngutivissuisa ilaannik annaasaqarpoq.

Uffe Ellemann-Jensenip nulia ilaqutaalu misigeqatigingaarpakka.

Eqqaaneqarnera ataqqinartuuli.

Inatsisartut Siulittaasuat

Kim Kielsen