2024 2023 2022 Flere år...
09-08-2022
Illuut A/S Noorlerni sanaartulerpoq
Inatsisartunut ilaasortat najugaqarfissaannik attartornermut pisortat aningaasartuutigisartagaasa annikillisinneqarnissaat siunertaralugu Inatsisartunut qinikkat Nuup avataaneersut najugaqarfigisartagassaannik inissialiortiternissaq qinigaaffinni arlalinngortuni sulissutigineqarsimavoq.
Inatsisartut taamatuttaaq Inatsisartut siulittaasoqarfiat piginnaatissimavaat Inatsisartunut ilaasortat Nuup avataaneersut najugaqarfissaannik sanaartornissaq eqqarsaatigalugu isumaqatigiissuteqartarnissaanut.
Taamaalillutik Inatsisartut ulloq 14. juni 2022 inissiat qangali pilersaarutigineqartutut Noorlerni sanaartorneqartussat pillugit Illuut A/S-imik attartornissamik isumaqatigiissuteqarput. Illuut A/S tamakkiisumik Namminersorlutik Oqartussanit pigineqartoq illuutinik sanaartortuussaaq piginnittuullunilu, soorlu aamma inissiat ulluinnarni ingerlanneqarnerat Illuut A/S-imit isumagineqassasoq.
Sanaartornerup sumiiffik sanaartorfigineqartussaq ukiorpassuarnilu illunit aserfallakkiartortunit takussunarsarneqarsimasoq annertuumik takujuminarsisissavaa.
Sanaartorneq aallartinneqassaaq sanaartorfissami illuutit pioreersut ingitserneqarnerisigut. Tamatumani ilaatigut pineqarput inissiat siusinnerusukkut peqqissaasunngorniarlutik ilinniartut najugaqarfigisimasaat oqullu pissutigalugu 2014-imi najugaqarfigineqarunnaarsimasut ullumilu najugaqarfigineqaratik aserfallassimaqisut.
Inissiat nutaat siulliit 2024-imi piareersimanissaat naatsorsuutigineqarpoq.
Ingitserineq - Asbest aamma PCB
Illuutit pioreersut mingutsitsinnginnissaq eqqarsaatigalugu malittarisassat malillugit ingitserneqassapput. Ingitserinermik suliassaq aallartinneqareerpoq suliassarlu Larsen og Co-mit ingerlanneqarluni. Ingitserinermut atatillugu sanaartugatoqqani asbesteqarnersoq PCB-qarnersorluunniit misissorneqassaaq. Taamaattoqassagaluarpat sumiiffinni akuutissat ulorianartut siammaateqqunagit pisariaqartunik iliuuseqartoqarumaarpoq soorlu aamma sanaartornermut atortuusimasut mingutsinneqarsimasut illersorneqarsinnaasunik aserorterneqarlutillu inissinneqassallutik.
Siusinnerusukkut pisut: Akigitinniagaq unammillernartoqarsimavoq
Suliniut siusinnerusukkut marloriarluni suliariumannittussarsiuunneqarsimagaluarpoq sanaartornissalli aallartinneqarneranik kinguneqanngitsumik.
Suliariumannittussarsiuussisarnerni akit neqerooruutigineqartut qaffasippallaartarsimanerat pissutaavoq, taamaattumillu suliniut naqqaniit misissoqqissaarneqaqqissimavoq. Tamatumani paasinarsivoq akit qaffasinnerinut sanaartorfigisassami pissutsit sanaartornermullu illoqarfiup ilaanut pilersaarummi piumasaqaatit pissutaasut.
Sanaartornerup sanaartukkanut oqaluttuarisaanermut pingaarutilinnut sumiiffinnullu eqqissisimatitanut qanittuunera sanaartukkat ilusilersorneqarnerinut ilusissaannullu kommunip pilersaarutaani piumasaqaatinut attuumassuteqarpoq. Assersuutigalugu sanaartukkat silataasa qisuunissaat qummullu quleriit amerlanerpaamik marluunissaat piumasaqaataavoq.
Peqatigitillugu sanaartortitsinerup piujuaannartitsinissamik tunngaveqarnissaa Inatsisartut Siulittaasoqarfiata sanaartortitsisullu Illuut A/S-ip siunertarisimavaat. Sanaartornermi atortussiat aserfallatsaalineqarnissamik annikinnerpaamik pisariaqartitsisut toqqarneqarsimapput. Assersuutigalugu illup silataata qisuttassai aserfallatsaalisariaqarpianngitsutut ilisimaneqartut toqqarneqarsimapput. Tamanna illuutit ingerlanneqarnerannut aningaasartuutinut pingaaruteqarpoq ungasinnerusorlu isigalugu akilersinnaanerpaajulluni.
Aalajangersimasumik najugaqartinneqarneq iluaqutaassaaq
”Inatsisartunut qinikkanut Nuup avataaneersunut najugaqarfissatut aalajangersimasumik inissialiorneq aningaasaqarniarneq eqqarsaatigalugu isumatusaarneruvoq. Maannamut Inatsisartut katersuunnissaat sioqqullugit piffissamut katersuunnerup sivisussusissaanut naatsorsuutigineqartumut inissianik attartortikkanik attartornissamik isumaqatigiissuteqartariaqartarsimavoq.
Tamanna allaffeqarfitsinnut annertuumik suliakkersuutaasimavoq maanna unitsinneqartussamik. Peqatigitillugu katersuunnerit nalaanni inissianik attartornermut akigitinneqartut qaffaseqalutillu qaffakkiartorsimapput – aamma ilaasortanut inissianik ukioq tamaat atorneqarsinnaasunik aktiaateqarluni ingerlatseqatigiiffiup namminersorlutik oqartussanit pigisaqartup Illuutip sanaartornermut aningaasartuutissaanut sanilliullugu.
Ukioq tamaat atorneqarsinnaasunik sanaartornerup aamma malitsigissavaa ungasinnerusoq isigalugu Inatsisartuni ataatsimiinnissat sivikinnerusumik piffissaqartitsilluni aaqqissuunneqarsinnaalissammata, soorlu aamma ataatsimiinnerit ukiup ilaanut sivisunerusumut siammarneqarsinnaalissammata. Aalajangersimasumik najugaqarfeqalerneq taamaalilluni aamma inatsisartutigoortumik sulinermut killiliussat pitsaanerulernissaannut peqataasinnaassaaq. Soorluttaaq partiit siulittaasui tamarmiusut suliniummut tamakkiisumik tapersiisimasut.” – Inatsisartut siulittaasuat oqarpoq.
